ស្រុកកំពង់ត្រឡាច ខេត្តកំពង់ឆ្នាំងបានក្លាយជាតំបន់សក្តានុពលដ៏ទាក់ទាញសម្រាប់ភ្ញៀវទេសចរបរទេសក្រោយរទេះគោជាច្រើនដាច់កន្ទុយភ្នែកបានត្រៀបត្រាបង្អួតសម្រស់
ស្រុកកំពង់ត្រឡាច ខេត្តកំពង់ឆ្នាំង បានក្លាយជាតំបន់សក្តានុពលដ៏ទាក់ទាញសម្រាប់ភ្ញៀវទេសចរបរទេសទីកន្លែងមួយនេះកំពុងឆក់យកបេះដូងអ្នកទេសចរជាខ្លាំងក្រោយរទេះគោជាច្រើនដាច់កន្ទុយភ្នែកបានត្រៀបត្រាបង្អួតសម្រស់ចំពោះអ្នកទេសចរ និងបានជូនអ្នកទេសចរជាច្រើនដើរទស្សនាកន្លែងផ្សេងៗ ជាពិសេសគំនូរបុរាណ និងព្រះវិហារវត្តពោធិ៍រុក្ខារាមដែលជាសម្បត្តិបេតិកភណ្ឌជាតិមួយដ៏ផូរផង មានអាយុកាលរាប់រយឆ្នាំ នេះបើយោងតាមផេកផ្លូវរបស់មន្ទីរទេសចរណ៍ខេត្តកំពង់ឆ្នាំង។ ស្ទើរតែរៀងរាល់ថ្ងៃតែងមានក្រុមភ្ញៀវទេសចរបរទេសធ្វើដំណើរតាមកប៉ាល់ និងរថយន្តក្រុងធំៗចូលមក ដើម្បីជិះរទេះគោដើរកម្សាន្តកាត់តាមទីជនបទរបស់ស្រុក និងជាពិសេសចូលទស្សនាគំនូរបុរាណ និងព្រះវិហារវត្តពោធិ៍រុក្ខារាមដែលជាសម្បត្តិបេតិកភណ្ឌជាតិមួយ មានអាយុកាលប្រមាណជាង១០០ឆ្នាំហើយ»។
ភ្ញៀវទេសចរបរទេសភាគច្រើនចូលមកតាមកប៉ាល់ ដែលចូលចតនៅកំពង់ផែទេសចរណ៍ផ្សារក្រោម ក្នុងគោលបំណងទៅទស្សនាសហគមន៍ផលិតក្អមឆ្នាំង នៅភូមិអណ្តូងឬស្សី និងទស្សនាផ្ទះបណ្តែតទឹក នៅតាមដងទន្លេ ។ ចំណែកមួយច្រកទៀត គឺចូលតាមរយៈកប៉ាល់ដូចគ្នា ដែលចូលចតនៅដងទន្លេស្រុកកំពង់ត្រឡាច ដើម្បីជិះរទេះគោទៅទស្សនាវត្តពោធិ៍រុក្ខារាម និងទស្សនាទេសភាពតាមភូមិរបស់បងប្អូនប្រជាពលរដ្ឋនៅស្រុកកំពង់ត្រឡាច ។
ក្រៅពីនោះ ក៏មានទេសចរបរទេសមួយចំនួនក៏ចូលមកទស្សនាខេត្តកំពង់ឆ្នាំងរបស់យើង តាមរយៈការធ្វើដំណើរផ្លូវគោកផងដែរ ។ 
