ឃាត់ខ្លួនជនសង្ស័យម្នាក់បញ្ជូនទៅសាលាដំបូងខេត្ត ពាក់ព័ន្ធបន្លំប្រើឯកសណ្ឋានកងរាជអាវុធហត្ថ
បន្ទាយមានជ័យ ៖ ឃាត់ខ្លួនជនសង្ស័យម្នាក់ប្រើប្រាស់ឯកសណ្ឋានកងរាជអាវុធហត្ថ ត្រូវបញ្ជូនទៅសាលាដំបូងខេត្តចាត់ការតាមច្បាប់នៅថ្ងែទី១៨ ខែកុម្ភៈ ឆ្នាំ២០២៤។ ការឃាត់ខ្លួននេះធ្វើឡើងនៅថ្ងៃទី១៧ ខែកុម្ភៈ ឆ្នាំ២០២៤ នៅចំណុចភូមិតេជោភ្នំឆ័ត្រ ឃុំ.ស្រុកស្វាយចេក ។
លោកអនុសេនីយ៍ឯក ភិន ចេតនា មេបញ្ជាការស្តីទីកងរាជអាវុធហត្ថស្រុកស្វាយចេកបានប្រាប់ថា ជនសង្ស័យមានឈ្មោះ គុជ វិតី ភេទប្រុស អាយុ២៦ឆ្នាំ រស់នៅភូមិចំការគោ ឃុំ.ស្រុកស្វាយចេក។ លោកថា ក្រោយស្រាវជ្រាវបានដឹងហើយសហការជាមួយអាជ្ញាធរមូលដ្ឋានកម្លាំងកងរាជអាវុធហត្ថស្រុកស្វាយចេក បានចុះបង្ក្រាបឃាត់ខ្លួនជនសង្ស័យម្នាក់ និងដកហូតមានសម្ភារៈប្រើប្រាស់និងឯកសណ្ឋានពណ៌ទឹកប៊ិចដាក់ឡូហ្គោ (អ.ហ)១កំប្លេ ស្បែកជើងកវែង១គូ ស្បែកជើងកខ្លី១គូ មួកឆាងពណ៌ទឹក១ មួកប៉េរ៉េ១ ខ្សែក្រវ៉ាន់១ វិទ្យុទាក់ទង ម៉ូតូរ៉ូឡា១ អាវកាក់ស្លាក់សញ្ញា (អ.ហ)១ ខ្សែក្រវ៉ាត់ធំរឺខ្សែស៊ិនណារ៉ុង១ ពិលពណ៌ខ្មៅ១ ខ្សែបន្តោងសម្រាប់ដាក់កាត១ កាបូបដាក់ប្រាក់១ អត្តសញ្ញាណប័ណ្ណសញ្ញាតិខ្មែរ១សន្លឹក ដែលឃាត់នៅថ្ងៃទី១៧ ខែកុម្ភៈ ឆ្នាំ២០២៤ នៅចំណុចភូមិតេជោភ្នំឆ័ត្រ ឃុំ.ស្រុកស្វាយចេក ។
លោកអនុសេនីយ៍ឯក ភិន ចេតនា បានបញ្ជាក់ថា ក្រោយឃាត់ខ្លួនជនសង្ស័យ និងសម្ភារៈប្រហាក់ប្រហែលគ្នាកងកម្លាំងបានបញ្ជូនមកសាកសួរនៅទីបញ្ជាការមូលដ្ឋានកងរាជអាវុធហត្ថស្រុកស្វាយចេក ដើម្បីសាកសួរតាមចម្លើយសារភាពត្រូវបានកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់៕
