ល្បែងស៊ីសងគ្រប់ប្រភេទតាមប្រព័ន្ធអនឡាញកំពុងតែដំណើរការយ៉ាងពេញទំហឹងនៅក្នុងខេត្តរតនគិរី
ខេត្តរតនគិរី ៖ តាមប្រភពនៅខេត្តរតនគិរី បានអោយដឹងថា ល្បែងស៊ីសងគ្រប់ប្រភេទតាមប្រព័ន្ធអនឡាញដូចជាជល់មាន់ផ្លែកាំបិត និងកំពុងតែដំណើរការយ៉ាងពេញទំហឹងនៅក្នុងក្រុងបានលុងទាំងមូល និងតាមបណ្តាស្រុកមួយចំនួនទៀតក្នុងខេត្តរតនគិរីសមត្ថកិច្ចនិងអាជ្ញាធរមូលដ្ឋានកំពុងអនុញ្ញាតឲ្យបើកលេងយ៉ាងអនាធិបតេយ្យ និងខ្លាំងក្លាណាស់។
ការបើកលេងល្បែងស៊ីសងខុសច្បាប់នេះ ដោយចំហគឺលេងជារៀងរាល់ថ្ងៃដែលបានបង្កការរំខានដល់ប្រជាពលរដ្ឋរស់នៅក្បែរៗបរិវេណនោះ ។ ការបង្កឲ្យកើតមានល្បែងស៊ីសងទាំងនេះ ហាក់បីដូចជាគ្មានគោលការណ៍ និងទប់ស្កាត់ឬបង្ក្រាបឡើយពីកម្លាំងសមត្ថកិច្ចជំនាញនិងមន្ត្រីអាជ្ញាធរ ទំនងជាឆ្នាំងបាយប្រចាំថ្ងៃផងក៏មិនដឹង បានជាមានការត្រូវដងត្រូវផ្លែនិងគ្នារលូនល្អណាស់ ទើបបន្តបណ្តែតបណ្តោយឲ្យដំណើរការបានយ៉ាងអនាធិបតេយ្យបែបនេះ ។
ប្រភពពីប្រជាពលរដ្ឋបានលើកឡើងថា ការបើកឲ្យល្បែងស៊ីសងតាមប្រព័ន្ធ Online គ្រប់ប្រភេទនេះហើយដែលនាំឲ្យពួកគាត់មានការព្រូយបារម្ភអំពីករណីចោរកម្មនិងអំពើហឹង្សាក្នុងគ្រួសានិងបទល្មើសផ្សេងៗទៀតកើតមានឡើង ។ ពួកគាត់លើកឡើងទៀតថា ស្ទើរគ្រប់ទីតាំងទៅហើយដែលមានល្បែងស៊ីសងតាមប្រព័ន្ធ Online នោះប្រហែលជាមានខ្សែខ្នងបង្អែកមានបុណ្យស័ក្តិធំ នៅចាំកាងពីក្រោយហើយ ទើបគេហ៊ានឲ្យបើកលេងពេញទូទាំងខេត្តបែបនេះបាន។
នៅតាមទីតាំងមួយចំនួនដែលកំពុងតែប្រម៉ូលផ្តុំគ្នាលេងនោះ តែងហ៊ោកញ្ជ្រៀវយ៉ាងអ៊ូអរបំផុត ដូចជានៅទីប្រជុំជននានា ក្នុងក្រុងបានលុង ដូចជានៅភូមិអភិវឌ្ឍ, ភូមិថ្មី, ភូមិបួន, ភូមិអូរកន្សែង និងតាមបណ្តាស្រុកផងដែរតាមទីតាំងហាងការហ្វេ។ល។
បើតាមអ្នកលេងល្បែងតាមប្រព័ន្ធOnlineនោះបង្ហើបថា នៅតាមទីតាំងនីមួយៗគឺមានអ្នកប្រចាំការគ្រប់គ្រងដោះស្រាយទៀតផង បើមានសមត្ថកិច្ចណាមកសួរនាំ ។ ប្រជាពលរដ្ឋរស់ក្បែរទីតាំងលេងល្បែង Online ទាំងនោះបានឲ្យដឹងទៀតថា តាមភូមិ ស្រុកនានា ក្នុងខេត្តរតនគិរីទាំងមូលនេះកើតមានការបើកឲ្យលេងស្ទើរតែគ្រប់ភូមិទៅហើយតាមភូមិសាស្ត្រដាច់ស្រយាល ។
ប្រភពពីសមត្ថកិច្ចក៏បានបង្ហើបដែរថា ការបើកឲ្យលេងល្បែងស៊ីសង តាម Online គ្រប់ប្រភេទទាំងអស់នោះ ក៏ធ្លាប់មានប្រជាពលរដ្ឋមកប្តឹងញឹកញាប់ដែរឲ្យជួយចុះបង្ក្រាប និងទប់ស្កាត់ ព្រោះសមាជិកខ្លួនរងគ្រោះចាញ់ល្បែងខាតបង់ការងាទំនាស់ក្នុងគ្រួសាអំពើហិង្សារជាដើមផង និងក៏ធ្លាប់មានលេងចាញ់អស់លុយច្រើនរហូតដល់ជំពាក់មេបនល្បែងនោះ មានលក់គោក្របីយសងគេទៀតផងក៏មានដែរ៕
