តុលាការចោទប្រកាន់ ករណីប៉ូលិសខេត្តស្ទឹងត្រែង ដឹកគ្រឿងញៀ.នតាមឡាន ចូលមកភ្នំពេញ ពីបទរក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀន
ភ្នំពេញ៖ តំណាងអយ្យការបានសម្រេចចោទប្រកាន់លើជនសង្ស័យ ទាំង ២នាក់ ដែលម្នាក់ជាប៉ូលិសខេត្តស្ទឹងត្រែង ពីបទរក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀន តាមបញ្ញត្តិមាត្រា៤៨ និងមាត្រា៤០ នៃច្បាប់ស្តីពីការត្រួតពិនិត្យគ្រឿងញៀន។ នេះបើយោងតាមសេចក្តីប្រកាសព័ត៌មានរបស់អ្នកនាំពាក្យនៃអយ្យការអមសាលាដំបូង រាជធានីភ្នំពេញ។
អ្នកនាំពាក្យតុលាការ បានបញ្ជាក់ថា «ក្រោយពីទទួលបានសំណុំរឿងពីសមត្ថកិច្ច និងបន្ទាប់ពីបានស៊ើបអង្កេតល្អិតល្អន់ និងគ្រប់ជ្រុងជ្រោយលើភ័ស្តុតាងនានា តំណាងអយ្យការបានសម្រេចចោទប្រកាន់លើជនសង្ស័យទាំងអស់ ២នាក់ ខាងលើ ពីបទរក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀន តាមបញ្ញត្តិមាត្រា៤៨ និងមាត្រា ៤០ នៃច្បាប់ស្តីពី ការត្រួតពិនិត្យគ្រឿងញៀន»។
សូមរម្លឹកថា នាយរងការិយាល័យនគរបាលចរាចរណ៍ ខេត្តស្ទឹងត្រែងម្នាក់ រួមនឹងបក្ខពួកម្នាក់ ត្រូវបានសមត្ថកិច្ច ចាប់ខ្លួន ខណៈធ្វើសកម្មភាពដឹកជញ្ជូនគ្រឿងញៀន ទៅលក់ នៅរាជធានីភ្នំពេញ កាលពីរំលងអធ្រាត្រ ថ្ងៃទី២៧ ចូលថ្ងៃទី២៨ ខែមករា ឆ្នាំ២០២៤។
ការឃាត់ខ្លួននេះ បានធ្វើឡើង ក្នុងពេលកងកម្លាំងចម្រុះ បានដាក់ប៉ុស្តិ៍ត្រួតពិនិត្យអាវុធជាតិផ្ទុះ និងជាតិស្រវឹង នៅមុខមន្ទីរពេទ្យជោរៃ តាមផ្លូវជាតិលេខ១ ចំណុចបឹងស្នោរ។ ក្នុងពេលឃាត់ខ្លួនជនសង្ស័យ ២នាក់នោះ កងកម្លាំងសមត្ថកិច្ច បានដកហូតម្សៅក្រាមពណ៌សថ្លា (សង្ស័យគ្រឿងញៀន) ៥កញ្ចប់ធំ (៥Kg) និងម្សៅកញ្ចប់ពណ៌ស្វាយ មានអក្សរថៃ លេខ២០២៣ ចំនួន ១០០កញ្ចប់តូច ស្រោមអាវុធខ្លី ១ មានគ្រាប់ចំនួន ៦គ្រាប់ និងរថយន្ត ១គ្រឿង ម៉ាកឡិចស៊ីស ៣៣០ ពណ៌ទឹកប៊ិច ផ្លាកលេខ ភ្នំពេញ 2BH 9687 ។
ជនសង្ស័យទាំងពីរនាក់នេះ មានម្នាក់ឈ្មោះ ប្រាក់ ភារម្យ ជាមន្ត្រីនគរបាល ឋានៈអនុប្រធានការិយាល័យចរាចរណ៍ជើងគោក ពាក់ស័ក្តិ ៤កន្លះ នៃស្នងការដ្ឋាននគរបាល ខេត្តស្ទឹងត្រែង៕
