ក្រយ៉ៅគុកមែន..! ទើបចេញពីពន្ធនាគារបានជាង៣០ថ្ងៃ ត្រូវសមត្ថកិច្ចចាប់បញ្ជូនទៅសារជាថ្មី ពីបទលួច
បាត់ដំបង៖ អតីតទណ្ឌិតវ័យក្មេងម្នាក់ ដែលមានប្រវត្តិប្រព្រឹត្តអំពើ«ចោរកម្ម»តាំងពីនៅវ័យអានីតិជន រហូតចុងក្រោយត្រូវតុលាការសម្រេចផ្តន្ទាទោសមួយឆ្នាំ ហើយពេលនេះទើបចេញពីពន្ធនាគារបានជាង៣០ថ្ងៃប៉ុណ្ណោះ ឥឡូវត្រូវបានសមត្ថកិច្ចឃាត់ខ្លួនជាថ្មីក្នុងករណី«លួចទូរស័ព្ទ» ដើម្បីកសាងបញ្ជូនទៅតុលាការ ជាមួយនឹងជនម្នាក់ទៀត ដែលជាអ្នកទទូលផលចោរកម្ម។
អតីតទណ្ឌិតរូបនេះឈ្មោះ ឡា ប៉ូ អាយុ១៦ឆ្នាំ និងជនម្នាក់ទៀតដែលទទូលផលចោរកម្មឈ្មោះ អ៊ួន រី ហៅ ឌីឌូ អាយុ២១ឆ្ណាំ រស់នៅភូមិព្រែកព្រែកមហាទេព សង្កាត់ស្វាយប៉ោ ក្រុងបាត់ដំបង។ ជនទាំងពីរនាក់ ត្រូវបានកម្លាំងអធិការក្រុងបាត់ដំបងឃាត់ខ្លួន កាលពីថ្ងៃទី ២៥ មករា ក្រោយមួយថ្ងៃ ដែលជនទាំងពីរនាក់នេះប្រព្រឹត្តបទល្មើស។ នេះបើតាមរបាយការណ៍របស់អធិការក្រុងបាត់ដំបង។
នាយផ្នែកនគរបាលយុត្ថិធម៌នៃអធិការក្រុងបាត់ដំបង លោក ប្រៀន អេលីសា បានឲ្យដឹងថា អំពើ«ចោរកម្ម» នេះបានកើតឡើង កាលពីវេលាម៉ោងជាង១១យប់ថ្ងៃទី ២៤ មករា នៅចំណុចភូមិដំណាក់ហ្លូង សង្កាត់វត្តគរ ក្រុងបាត់ដំបង ដែលរងគ្រោះឈ្មោះ ម៉ាន រីហ្វីន ប្រុសអាយុ៣៩ឆ្នាំ រស់នៅភូមិដាំស្ពៃ សង្កាត់ស្លាកែត ក្រុងបាត់ដំបង ។ លោក ប្រៀន អេលីសា បានបញ្ជាក់ថា ជនរងគ្រោះ ត្រូវជនសង្ស័យឈ្មោះ ឡា ប៉ូ លួចយកទូរស័ព្ទគាត់ចំនួនពីរគ្រឿង ពេលគាត់កំពុងដេកលក់ ដែលមួយគ្រឿងម៉ាក ហ្គូហ្គល និងមួយគ្រឿងទៀតម៉ាង អាយហ្វូន ១២ប្រូម៉េក។
ក្រោយទទូលបានពាក្យបណ្ដឹងជនរងគ្រោះ លោក ពេជ្រ សារ៉ែន អធិការក្រុងបានបញ្ជាឲ្យកម្លាំងជំនាញធ្វើការស្រាវជ្រាវរហូតកំណត់មុខសញ្ញាបាន និង ឈានដល់ការឃាត់ជនជនដៃដល់ឈ្មោះ ប៉ូ ហើយនិងឈានទៅឃាត់ខ្លួនអ្នកទទូលផលចោរកម្មឈ្មោះ ឌីឌូ ដែលជននេះតែងតែកុម្ម៉ង់ទិញទូរស័ព្ទពីឈ្មោះ ប៉ូ ដែលលួចបាន។
ប្រភពពីជនរងគ្រោះ បានអោយដឹងថា នៅយប់កើតហេតុ ខ្លួនបានទៅផឹកស៊ីនៅផ្ទះពួកម៉ាកនៅភូមិដំណាក់ហ្លួង ហើយស្រវឹងខ្លាំងមិនបានត្រឡប់មកផ្ទះទេ ក៏បានដេកនៅផ្ទះពួកម៉ាក លុះនៅវេលាទៀបភ្លឺ ក៏ស្រាប់តែបាត់ទូរស័ព្ទអស់ រហូតដល់ព្រឹកឡើងក៏ទៅប្ដឹងសមត្ថកិច្ចឲ្យជួយអន្តរាគមន៏។ ដោយឡែក បើស្ដាប់តាមចម្លើយសារភាពរបស់លោកចោរវ័យក្មេង ដែលមានប្រវត្តិ«លួច» ច្រើនរាប់មិនអស់ឈ្មោះ ឡា ប៉ូ វិញបាននិយាយប្រាប់សមត្ថកិច្ចថា នៅយប់កើហេតុ ខ្លួនបានដើរចេញពីផ្ទះ ក្នុងគោលបំណងដើរលួចតែម្ដង ហើយប៉ះលួចហ្នឹង។
ជននេះបាននិយាយពីរឿងដែលខ្លួនលួចទូរស័ព្ទជនរងគ្រោះខាងលើនេះដូច្នេះថា «តាមពិតម្ចាស់ទូរស័ព្ទខាងលើនេះ គាត់មិនដេកក្នុងផ្ឬះទេ។ គាត់ស្រវឹងហើយគាត់ដេកលើលូខាងមុខផ្ទះ។ ពេលខ្ញុំដើរទៅឃើញគាត់ដេកលើលូលក់ស្ដូកស្ដឹង ហើយឃើញទូរស័ព្ទគាត់លៀនចេញពីហោប៉ៅ ទើបខ្ញុំលូកយកទាំងពីរគ្រឿងតែម្ដង។ ពេលលួចបានខ្ញុំយកទៅលក់ឲ្យឈ្មោះ ឌីឌូ ព្រោះកន្លងមកគាត់តែងកុម្ម៉ង់ទិញពីខ្ញុំ ជាប្រចាំ»។
អតីតទណ្ឌិត ឡា ប៉ូ មានប្រវត្តិប្រព្រឹត្តអំពើ«ចោរកម្ម» តាំងនៅកុមារភាព ដែលកាលនោះមានអាយុទើបប្រហែល១១ទៅ១២ឆ្នាំ។ សមត្ថកិច្ចស្គាល់មុខសញ្ញាចោរវ័យក្មេងនេះច្បាស់ដូចថ្ងៃ ហើយតែងចាប់បានស្ទើររាប់ភ្លេច តែកាលនោះមិនត្រូវបានបញ្ជូនទៅតុលាការទេ ព្រោះតែគេស្ថិតនៅក្នុងវ័យអនីតិជន។ ប៉ុន្តែធ្លាប់បញ្ជូនទៅកាន់មណ្ឌលកែប្រែ(មណ្ឌលបន្សាបគ្រឿងញៀន)។ ក្រោយពេលចេញពីមណ្ឌលកែប្រែ ជននេះមានអាយុលើសពី១៤ឆ្នាំ ហើយបានដើរប្រព្រឹត្តអំពើ«ចោរកម្ម»ស្ទើររាល់យប់រាល់ថ្ងៃទៀត រហូតត្រូវសមត្ថកិច្ចចាប់បាន ហើយកសាងសំណុំរឿងបញ្ជុនទៅតុលាការ ព្រោះជននេះមានអាយុសមល្មមនឹងជាប់គុកហើយ។ ពេលនោះតុលាការបានសម្រេចផ្តន្ទាទោសជននេះឲ្យជាប់ពន្ធនាគាររយះពេលមួយឆ្នាំ រហូតដល់ថ្ងៃទី ២២ ខែធ្នូ ឆ្នាំ២០២៣ ទើបត្រូវតុលាការ សម្រេចដោះលែងពីពន្ធនាគារវិញ។
បើគិតត្រិមថ្ងៃទី ២៤ មករា ២០២៤ ដែលជននេះបានប្រព្រឹត្តបទល្មើសជាថ្មី ក្រោយចេញពីគុក គឺមានរយៈពេលត្រិម៣២ថ្ងៃគត់ ក៏ត្រូវសមត្ថកិច្ចចាប់ខ្លួនបញ្ជូនទៅញ៉ាត់គុកជាថ្មីម្ដងទៀត។ តាមការសួរនាំ តាមការពិនិត្យលើសកម្មភាព និងមើលទឹកមុខជាក់ស្ដែង លោកចោរវ័យក្មេងដ៏ល្បីល្បាញម្នាក់នេះ គឺហាក់គ្មានក្ដីបារម្ភ ឬ រាងចាល ខ្លាចច្បាប់ទម្លាប់ ឬខ្លាចញញើតនឹងសមត្ថកិច្ចបន្តិចឡើយ។
នៅចំពោះមុខសមត្ថកិច្ចដែលទើបចាប់ខ្លួនជាថ្មីនេះ ជននេះបានសារភាពថា ខ្លួនពិតជាបានប្រព្រឹត្តអំពើ«ចោរកម្ម»ជាបន្តបន្ទាប់មែន ក្រោយចេញពីគុក។ ជននេះបានរាប់បង្ហាញត្រូសៗអំពីសកម្មភាព«លួច» ក្រោយចេញពីគុកដូច្នេះថា «ខ្ញុំចាំមិនអស់ទេ តែបើរាប់ត្រូសៗ ក្រោយចេញពីគុក ខ្ញុំលួចបានប្រហែល១០លើកប៉ុណ្ណោះ»។ នាយផ្នែកនគរបាលយុត្តិធម៏ បានបញ្ជាក់ដែរថា អតីតទណ្ឌិត ឈ្មោះ ឡា ប៉ូ ពិតជាបានសារភាពថា បានប្រព្រឹត្តអំពើ«ចោរកម្មច្រើនមែន ក្រោយចេញពីពន្ធនាគារ។ ប៉ុន្តែមានជនរងគ្រោះខ្លះបានដាក់ពាក្យបណ្ដឹង រីឯជនរងគ្រោះខ្លះទៀតមិនបានដាក់បណ្ដឹងទេ ។
លោកបានបញ្ជាក់បន្ថែមថា ចំពោះជនម្នាក់ឈ្មោះ ឌីឌូ ដែលត្រូវឃាត់ខ្លួនពីបទ«ទទូលផលចោរកម្ម»ខាងលើនេះ គឺជននេះតែងតែកុម្ម៉ងទិញរបស់របរពីឈ្មោះ ឡា ប៉ូ ដែលលួចបាន។ ជាពិសេសកុម្ម៉ង់ទិញទូរស័ព្ទតែម្ដង។ យ៉ាងណាក្ដី ពេលនេះកម្លាំងជំនាញ បានបញ្ជូនជនទាំងពីរនាក់ទៅតុលាការហើយ៕ 
