ឆ្នាំ២០២៤ ក្រសួងការងារ នឹងចុះស្រាវជ្រាវរករោងចក្រសហគ្រាសដែលមិនចុះបញ្ជី និងមិនបញ្ជូនឈ្មោះបុគ្គលិកទៅ ប.ស.ស

អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានអោយដឹងថា ឆ្នាំ២០២៤នេះ ក្រសួងការងារនិងបណ្តុះបណ្តាលវិជ្ជាជីវៈ នឹងបញ្ជួនមន្ត្រីចុះស្រាវជ្រាវរករោងចក្រសហគ្រាស ឬក្រុមហ៊ុនណាដែលមិនបានចុះបញ្ជី និងមិនបញ្ជូនឈ្មោះបុគ្គលិកទៅ ប.ស.ស ដែលជាហេតុធ្វើឱ្យពួកគាត់ទាំងនោះមិនអាចទទួលបានការធានារ៉ាប់រងរបបសន្តិសុខសង្គមផ្នែកថែទាំសុខភាព ផ្នែកហានិភ័យការងារ និងផ្នែកប្រាក់សោធន រួមទាំងអត្ថប្រយោជន៍របបសន្តិសុខសង្គមផ្សេងៗជាច្រើនទៀតដែលផ្ទុយពីច្បាប់ស្តីពីរបបសន្តិសុខសង្គម។

លោក កត្តា អ៊ន អ្នកនាំពាក្យក្រសួងការងារ បានអោយដឹងថា នៅពេលដែលក្រុមអធិការកិច្ចការងាររកឃើញរោងចក្រសហគ្រាសណាដែលលាក់បាំងបុគ្គលិក វាជារឿងមួយផ្ទុយទៅនឹងច្បាប់ការងារធ្វើឱ្យខាតប្រយោជន៍ដល់កម្មករនិយោជិតពិសេសការទទួលបានរបបសន្តិសុខសង្គម។ អីចឹងហើយបានជាយើងតែងតែដាក់កំហិត ឬពិន័យចំពោះរោងចក្រនោះក្នុងករណីយើងដាក់វិន័យហើយរោងចក្រសហគ្រាសនោះមិនព្រមអនុវត្តតាមការណែនាំទៀត នោះយើងក៏អាចពិចារណានឹងបញ្ជួនសំណុំរឿងទៅតុលាការដោះស្រាយតាមច្បាប់។

លោក កត្តា អ៊ន បានលើកឡើងទៀតថា «ខ្ញុំសូមអំពាវនាវដល់រោងចក្រសហគ្រាសទាំងអស់ត្រូវគោរពច្បាប់ការងារឱ្យបានត្រឹមត្រូវដោយត្រូវបំពេញបែបបទ និងចុះបញ្ជិការោងចក្រសហគ្រាស និងចុះបញ្ជិកម្មករនិយោជិតរបស់ខ្លួនដើម្បីចូលរួមគោរពច្បាប់ការងារក៏ដូចជាគិតគូរដល់ផលប្រយោជន៍កម្មករនិយោជិតទាំងអស់គ្នា»។

គិតត្រឹមឆ្នាំ២០២៣ កម្ពុជាមានរោងចក្របម្រើលើវិស័យវាយនភណ្ឌ កាត់ដេរផលិតស្បែកជើង និងផលិតផលធ្វើដំណើរ និងកាបូប ចំនួន១៦៨០ រោងចក្រ និងមានកម្មករនិយោជិតជាង ៩១ម៉ឺននាក់ដោយបានប្រាក់ឈ្នួលប្រចាំឆ្នាំប្រមាណ២,៩ពាន់លានដុល្លារ៕