តុលាការខេត្តកពង់ស្ពឺ សម្រេចចោទប្រកាន់លើលោកស្នងការរងផ្កាយមួយ ពីបទ «ទ្វេពន្ធភាព»
ខេត្តកំពង់ស្ពឺ ៖ បន្ទាប់ពីបានបញ្ចប់នីតិវិធី នៃការស៊ើបសួរ ពេញមួយថ្ងៃ ព្រះរាជអាជ្ញា នៃអយ្យការអមសាលាដំបូងខេត្តកំពង់ស្ពឺ បានសម្រេចចោទប្រកាន់លើឈ្មោះ ង៉ាម រី ហៅ ឃុត វឌ្ឍនា ពីបទ ទ្វេពន្ធភាព ប្រព្រឹត្តនៅភូមិស្រែថ្នល់ សង្កាត់កណ្តោលដុំ ក្រុងច្បារមន ខេត្តកំពង់ស្ពឺ កាលពីថ្ងៃទី១៨ ខែមករា ឆ្នាំ២០២៤ តាមមាត្រា០៤ និងមាត្រា០៩ នៃច្បាប់ឯកពន្ធភាព។
លោក ទិន សុចិត្រា ព្រះរាជអាជ្ញារង អមអយ្យការសាលាដំបូងខេត្តកំពង់ស្ពឺ និងជាអ្នកនាំពាក្យ បានអោយដឹងថា ព្រះរាជអាជ្ញា បានបញ្ចប់នីតិវិធីស៊ើបសួរលើឈ្មោះ ង៉ាម រី ហៅ ឃុត វឌ្ឍនា ដោយក្នុងនោះ បានធ្វើការចោទប្រកាន់ពីបទ ទ្វេពន្ធភាព តាមមាត្រា០៤ និងមាត្រា០៩ នៃច្បាប់ឯកពន្ធភាព ។
យោងតាមច្បាប់ស្តីពីឯកពន្ធភាព មាត្រា៤ ៖ ទ្វេពន្ធភាពជាចំណងអាពាហ៍ពិពាហ៍ដែលបុរសមានប្រពន្ធពីរ ឯស្ត្រីមានប្តីពីរ។ ត្រូវចាត់ទុកថាមានពិរុទ្ធក្នុងបទទ្វេពន្ធភាព បុរស ឬស្ត្រីណា ដែលមានចំណងអាពាហ៍ពិពាហ៍ពីមុនមិនទាន់រលាយនៅឡើយ ហើយទៅចុះបញ្ជីអាពាហ៍ពិពាហ៍ថ្មីមួយទៀត។ អ្នកសមគំនិតត្រូវមានទោសដូចគ្នា ។ មាត្រា០៩ ជនណាប្រព្រឹត្តល្មើសនឹងមាត្រា៤ នៃច្បាប់នេះ ត្រូវផ្ដន្ទាទោសដាក់ពន្ធនាគារពី៦ខែ ដល់១ឆ្នាំ និងផ្ដន្ទាទោសពិន័យជាប្រាក់ពី ២០០,០០០រៀល ដល់១,០០០,០០០រៀល ឬផ្ដន្ទាទោសណាមួយ នៃទោសទាំងពីរ ។
លោក ទិន សុចិត្រា អ្នកនាំពាក្យរូបនេះ បានបន្ថែមថា ពេលនេះសំណុំរឿងកំពុងស្ថិតក្នុងដៃចៅក្រមស៊ើបសួរ ដើម្បីបន្តស៊ើបសួរលើសំណុំរឿងរបស់ឈ្មោះ ឃុត វឌ្ឍនា ហៅ ង៉ាម រី ។
សូមរំលឹកផងដែរថា លោកឧត្តមសេនីយ៍ត្រី ង៉ាម រី ហៅ ឃុត វឌ្ឍនា មានតួនាទីជាស្នងការរង នៃស្នងការដ្ឋាននគរបាលខេត្តកំពង់ស្ពឺ ទទួលផែនអន្តរាគមន៍។ លោកត្រូវបានឃាត់ខ្លួន កាលពីព្រលប់ថ្ងៃទី១៨ ខែមករា ឆ្នាំ២០២៤ តាមបណ្តឹងរបស់ភរិយាដើមរបស់លោក ។
លោកឧត្តមសេនីយ៍ត្រី ង៉ាម រី ត្រូវភរិយាដើមប្តឹង បន្ទាប់ពីលោកបានក្លែងឯកសារ ហើយរៀបការជាមួយនារីម្នាក់ទៀត ដែលជាអាជីវករលក់បាយនៅក្នុងសង្កាត់កណ្តោលដុំ ក្រុងច្បារមន ខេត្តកំពង់ស្ពឺ ដោយមិនទាន់បានលែងលះដាច់ស្រេច។ នៅក្នុងឯកសារក្លែងលោក ង៉ាម រី បានប្តូរឈ្មោះពី ង៉ាម រី ទៅជា ឃុត វឌ្ឍនា និងបានបញ្ជាក់ភាពពោះម៉ាយ ដោយលោក ហែន កន ចៅសង្កាត់បឹងសាឡាង រាជធានីភ្នំពេញ ។
លោកឧត្តមសេនីយ៍ត្រី ង៉ាម រី ហៅ ឃុត វឌ្ឍនា ត្រូវបានឯកភាពឱ្យរៀបអាពាហ៍ពិពាហ៍ជាមួយនារីម្នាក់ ដែលជាភរិយាក្រោយ ដោយលោកចៅសង្កាត់កណ្តោលដុំ កាលពីថ្ងៃទី៣ ខែមករា ឆ្នាំ២០២៤ ហើយពិធី នឹងចាប់ផ្តើមធ្វើនៅថ្ងៃទី១៨-១៩ ខែមករា ឆ្នាំ២០២៤ នៅចំណុចផ្ទះខាងស្រី ក្នុងភូមិស្រែថ្នល់ សង្កាត់កណ្តោលដុំ ក្រុងច្បារមន ខេត្តកំពង់ស្ពឺ៕
