ប្រពន្ធជនរងគ្រោះដែលត្រូវរថយន្ដ Jeep បុកស្លាប់នៅខណ្ឌទួលគោក នឹងចូលទៅបំភ្លឺនៅតុលាការភ្នំពេញ តាមកាលកំណត់របស់តំណាងអយ្យការ

(ភ្នំពេញ)៖ ប្រពន្ធរបស់កីឡាករវាយសីជម្រើសជាតិ ដែលត្រូវរថយន្ដ Jeep បុកស្លាប់នៅខណ្ឌទួលគោក បានអះអាងថា ខ្លួន និងសាច់ញាតិដែលរងបណ្ដឹងពីម្ដាយជនបង្កនោះ នឹងចូលទៅបំភ្លឺនៅសាលាដំបូងរាជធានីភ្នំពេញ នៅថ្ងៃទី២៤ ខែមករា ឆ្នាំ២០២៤ តាមកាលកំណត់របស់តំណាងអយ្យការ ទោះបីគាត់មិនទាន់ទទួលបានសំណងរដ្ឋប្បវេណីយ៉ាងណាក្ដី។ នេះបើយោងតាមសារព័ត៌មានក្នុងស្រុកបានចេញផ្សាយនៅមុននេះបន្តិច​។

លោកស្រី គ្រុយ ឈិញលាំង បានសម្ដែងនូវការហួសចិត្តជាខ្លាំង ដែលខ្លួនជាជនរងគ្រោះបាត់បង់ប្ដី ដោយសារជនបង្កបើករថយន្ដបុកស្លាប់ ទាំងដែលមិនទាន់ធ្វើបុណ្យ១០០ថ្ងៃផងនោះ បានក្លាយទៅជាជនសង្ស័យក្នុងសំណុំរឿងផ្សេងទៅវិញ តែទោះជាយ៉ាងណាលោកស្រី និងគ្រួសារ មិនខ្លាចរអាក្នុងការបំភ្លឺឡើយ។

លោកស្រី ថា «ឥលូវនេះមិនទាន់គ្រប់១០០ថ្ងៃរបស់ប្តីខ្ញ៉ំផង រឿងដែលហួសចិត្ត ខ្ញុំបានក្លាយពីជនរងគ្រោះទៅជាជនសង្ស័យ ក្នុងសំណុំរឿងផ្សេងវិញ ទាំងដែលគេមិនដោះស្រាយរឿងបណ្តឹងប្តីខ្ញុំ។ ចំពោះការកោះហៅរបស់តុលាការ នាងខ្ញុំមិនខ្លាចក្នុងការចូលបំភ្លឺទេ ក្នុងករណីនេះព្រោះនាងខ្ញុំ ព្រមទាំងសមាជិកគ្រួសារទាំងអស់ ឈរលើភាពត្រឹមត្រូវ និងសុំតែយុតិ្តធម៌ជូនស្វាមីនាងខ្ញុំ»។

ដោយឡែក សម្រាប់សំណងរដ្ឋប្បវេណីវិញ លោកស្រី គ្រុយ ឈិញលាំង ក្នុងនាមជាដើមបណ្ដឹងនោះ ក៏នឹងត្រូវចូលទៅឆ្លើយបំភ្លឺ នៅថ្ងៃទី២៩ ខែមករា ឆ្នាំ២០២៤ខាងមុខនេះដូចគ្នាដែរ។

សូមជម្រាបថា ករណីរថយន្ដទំនើប ម៉ាក Jeep បើកបុកកីឡាករវៃសីជម្រើសជាតិម្នាក់ស្លាប់ នៅខណ្ឌទួលគោកកាលពីពេលថ្មីៗកន្លងទៅ ចោលប្រពន្ធ និងកូនតូចឲ្យនៅកំព្រា នៅពេលនេះបានលេចចេញរូបភាពថ្មីមួយទៀត និងមានការចែកចាយព្រោងព្រាតតាមបណ្តាញសង្គម នោះគឺម្តាយរបស់ជនបង្កបានដាក់ពាក្យប្តឹងប្រពន្ធសព និងសាច់ញាតិជនរងគ្រោះសរុប៤នាក់ ពីបទ «បរិហាកេរ្តិ៍ជាសាធារណៈ» រហូតតំណាងអយ្យការចេញដីកាកោះ ទៀតផង។

ដីកាកោះ៤សន្លឹកដែលចេញដោយលោក សេង ម៉េងស្រ៊ុន ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ត្រូវបានគេចែកចាយនៅតាមបណ្ដាញសង្គម Facebook ព្រមជាមួយមតិរិះគន់ធ្លាក់មកជាបន្ដបន្ទាប់ ក្រោយឃើញថា ដើមបណ្ដឹងឈ្មោះ សុខ លីណា (ម្ដាយជនបង្ក) បានប្ដឹងទៅលើប្រពន្ធ និងសាច់ញាតិរបស់ជនរងគ្រោះ ដែលបានបាត់បង់ជីវិតដោយសាររថយន្ដបុកស្លាប់ទៅវិញ។

ប្រពន្ធ និងសាច់ញាតិដែលត្រូវម្ដាយជនបង្កប្ដឹងទៅតុលាការនោះ សរុបចំនួន៤នាក់ រួមមាន៖ ទី១៖ឈ្មោះ គ្រុយ ឈិញលាំង ភេទស្រី (ប្រពន្ធជនរងគ្រោះ), ទី២៖ឈ្មោះ សំរិទ្ធ សារុន ភេទប្រុស (ឪពុកធំជនរងគ្រោះ), ទី៣៖ឈ្មោះ សៀង មួយអេង ភេទស្រី (ប្អូនបង្កើតជនរងគ្រោះ) និងទី៤៖ឈ្មោះ សៀង សេរីរដ្ឋា ភេទស្រី (ប្អូនបង្កើតជនរងគ្រោះ)។ ក្នុងដីកានោះ បានបញ្ជាក់ទៀតថា ធ្វើឡើងតាមបណ្ដឹងឈ្មោះ សុខ លីណា (ម្ដាយជនបង្ក) ពីបទ «បរិហាកេរ្ដិ៍ជាសាធារណៈ», «បរិហាកេរ្ដិ៍តាមសារព័ត៌មាន» និងបទ «ជេរប្រមាថជាសាធារណៈ»៕