រដ្ឋមន្ត្រីយុត្តិធម៌ ប្រកាសដាក់ចេញសសរស្តម្ភ២ ដើម្បីធ្វើកំណែទម្រង់ប្រព័ន្ធតុលាការនៅកម្ពុជា
ភ្នំពេញ ៖ ថ្លែងនៅក្នុងកិច្ចប្រជុំផ្សព្វផ្សាយ ស្តីពី កិច្ចដំណើរការរបស់ខ្លួនដល់អង្គការសង្គមស៊ីវិល និងដៃគូអភិវឌ្ឍន៍ កាលពីថ្ងៃទី១៥ ខែមករា ឆ្នាំ២០២៤ រដ្ឋមន្ត្រីក្រសួងយុត្តិធម៌ បានប្រកាសដាក់ចេញសសរស្តម្ភ ចំនួន២ ដើម្បីធ្វើកំណែទម្រង់ប្រព័ន្ធតុលាការនៅកម្ពុជា ឲ្យបានឆាប់រហ័សជូនប្រជាពលរដ្ឋ ក្នុងនោះ ដោះស្រាយវិវាទក្រៅប្រព័ន្ធតុលាការ ។
លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) បានលើកឡើងថា កិច្ចប្រជុំផ្សព្វផ្សាយនេះ ត្រូវបានរៀបចំទ្បើង ក្នុងគោលបំណងសំខាន់ចំនួន ២ គឺទី១. ដើម្បីផ្សព្វផ្សាយឱ្យកាន់តែស៊ីជម្រៅបន្ថែមទៀត អំពីកិច្ចដំណើរការរបស់អាជ្ញាធរជាតិដោះស្រាយវិវាទ ក្រៅប្រព័ន្ធតុលាការ និងទី២. ពិនិត្យលទ្ធភាព ក្នុងការធ្វើកិច្ចសហការជាមួយគ្នា ក្នុងកិច្ចដំណើរការក្នុងការជួយដោះស្រាយវិវាទក្រៅប្រព័ន្ធតុលាការ ជូនដល់ប្រជាពលរដ្ឋ ។
លោក ថា ជាទិសដៅការងារទៅមុខ ការកែទម្រង់ប្រព័ន្ធយុត្តិធម៌នៅកម្ពុជា នឹងត្រូវប្រមូលផ្តុំការយកចិត្តទុកដាក់ទៅលើសសរស្តម្ភ ចំនួន២ គឺសសរស្តម្ភទី១- ការកែទម្រង់ប្រព័ន្ធតុលាការ ដោយផ្តោតលើគុណភាព និងប្រសិទ្ធភាព នៃការផ្តល់សេវាយុត្តិធម៌ប្រកបដោយភាពឆាប់រហ័ស និងផ្តោតលើគុណភាព នៃយុត្តិធម៌ ប្រកបដោយភាពសុក្រឹត និងភាពត្រឹមត្រូវ និងសសរស្តម្ភទី២- ការកែទម្រង់ប្រព័ន្ធ ដោះស្រាយ វិវាទក្រៅប្រព័ន្ធតុលាការ ដែលមានលក្ខណៈងាយស្រួល សម្បូរបែប និងដោះស្រាយបញ្ចប់វិវាទ តាមរយៈការសម្រុះសម្រួលផ្សះផ្សាវិវាទឱ្យបានឆាប់រហ័សជូនប្រជាពលរដ្ឋ ព្រមទាំងរួមចំណែក លើកកម្ពស់វប្បធម៌សន្តិភាពនិយម ក្នុងសង្គមកម្ពុជា ។
លោកបន្ថែមថា ក្នុងន័យនេះ ការបង្កើត នូវអាជ្ញាធរជាតិ ដោះស្រាយវិវាទ ក្រៅប្រព័ន្ធតុលាការ គឺជាកិច្ចការអាទិភាពមួយ នៃគោលនយោបាយកែទម្រង់របស់រាជរដ្ឋាភិបាល នីតិកាលទី៧ និងជាការបោះជំហានថ្មីមួយ ក្នុងការកែទម្រង់ ប្រព័ន្ធដោះស្រាយវិវាទ នៅកម្ពុជា ។
ក្រោយពីបានស្តាប់បទបង្ហាញលើប្រធានបទចំនួន២ (ទី១)- អាជ្ញាធរជាតិ ដោះស្រាយវិ វាទក្រៅប្រព័ន្ធតុលាការ និង(ទី២)- គម្រោងនៃការ ដោះស្រាយវិវាទក្រៅប្រព័ន្ធតុលាការ សម្រាប់ក្រុមគោលដៅជាក្រុមជនជាតិដើមភាគតិច និងក្រុមអ្នករស់នៅតំបន់ដាច់ស្រយាល។ សូមជម្រាបថា អង្គប្រជុំក៏មានវេទិកាពិភាក្សាបើកទូលាយ ដើម្បីផ្តល់ឱកាសដល់អ្នកចូលរួមអាចលើកទ្បើងអំពីសំណួរ សំណូមពរ មតិយោបល់ និងការយល់ឃើញជុំវិញកិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ៕
