មន្រ្តីការិយាល័យផលិតកម្មខេត្តស្វាយរៀង សង្ស័យករណីងាប់ជ្រូក១៣០ក្បាល នៅស្រុកកំពង់រោទិ៍ ខេត្តស្វាយរៀង បណ្ដាលមកពីជំងឺប៉េស្តជ្រូកអាហ្វ្រិក

លោក ប៉ែន ចាន់ធី ប្រធានការិយាល័យផលិតកម្ម និងបសុព្យាបាលខេត្តស្វាយរៀង បានអោយដឹងថា មានសត្វជ្រូកឈឺងាប់ជាបន្ត បន្ទាប់ប៉ុន្មានថ្ងៃកន្លងមកហើយ បើទោះជាម្ចាស់ និងមន្ត្រីជំនាញ ខំប្រឹងព្យាបាលយ៉ាងណាក៏ដោយក៏មិន ជាដែរ ។លោកបានបញ្ជាក់ថា ជំនាញពេទ្យសត្វ បានយកសំណាកផ្ញើទៅធ្វើរោគវិភាគនៅវិទ្យាស្ថានប៉ាស្ទឺរ រួចរាល់ហើយ បច្ចុប្បន្នកំពុងរងចាំ់លទ្ធផល ថាជ្រូកនេះមានជំងឺអ្វីពិតប្រាកដ ទើបមន្ទីរ និងក្រសួង និង ចេញវិធានការដើម្បីទប់ស្កាត់ តែបើជំងឺប៉េស្តជ្រូកអាហ្វ្រិកប្រាកដមែន ជំងឺនេះងាយនឹងចម្លងទៅជ្រូកដែល ចិញ្ចឹមនៅជិតៗជាមិនខាន ហើយពិបាករកវ៉ាក់សាំងចាក់ទប់បានទាន់ពេលវេលាណាស់ ករណីនេះ លោក សង្ស័យថាមកពីជំងឺប៉េស្តជ្រូកអាហ្រ្វិក។

 

យ៉ាងណា នេះគ្រាន់តែជាសង្ស័យប៉ុណ្ណោះ ខណៈមន្រ្តីជំនាញបានយកសំណាកជ្រូកទាំងនោះទៅវិភាគ ដើម្បីឱ្យប្រាកដថា ករណីនេះកើតចេញពីជំងឺប៉េស្តជ្រូកអាហ្វ្រិក ឬយ៉ាងណា។ លោក ប៉ែន ចាន់ធី បន្ថែមដូច្នេះថា៖«យើងគ្រាន់តែសង្ស័យថាជាជំងឺប៉េស្តជ្រូកអាហ្វ្រិកប៉ុណ្ណោះ ដូច្នេះ យើងមិនអាចសន្និដ្ឋានឱ្យជាក់លាក់នោះទេ។ ឥឡូវ យើងរង់ចាំមន្រ្តីជំនាញគេយកសំណាកទៅវិភាគរកលទ្ធផលជាមុនសិន»។

ជាវិធានការ ការិយាល័យផលិតកម្ម និងបសុព្យាបាលខេត្តស្វាយរៀង បានផ្សព្វផ្សាយពីអំពីវិធានការការពារ បាញ់ថ្នាំសម្លាប់មេរោគតាមទ្រុង និងចែកថ្នាំចាក់ជ្រូកដល់ពលរដ្ឋដទៃ ដើម្បីបង្ការហានិភ័យជំងឺផ្សេងៗ។ បច្ចុប្បន្ន ជ្រូកទាំង១៣០ក្បាល ត្រូវបានគេកប់ និងដុតកម្ទេចចោលតែម្ដង៕