កម្ពុជាហាមមិនឲ្យនាំចូល គ្រឿងក្នុង និងបំណែកសាច់បង្កក រយៈពេល៦ខែ
ភ្នំពេញ៖ ក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទ បានចេញសេចក្ដីជូនដំណឹង អំពីវិធានការហាមឃាត់ការនាំចូលជាបណ្តោះអាសន្ន នូវគ្រឿងក្នុង និងបំណែកសាច់បង្កក រយៈពេល៦ខែ។ នេះបើយោងតាមសេចក្តីជូនដំណឹងរួមមួយរបស់ក្រសួងពាណិជ្ជកម្ម និងក្រសួងកសិកម្ម នាថ្ងៃទី១២ ខែមករា ឆ្នាំ២០២៤។
សេចក្តីជូនដំណឹងបានបញ្ជាក់ថា «វិធានការផ្អាកការនាំចូលជាបណ្ដោះអាសន្ននេះ នឹងចាប់ផ្ដើមអនុវត្តពីថ្ងៃទី១២ ខែមីនា រហូតដល់ថ្ងៃទី១២ ខែកញ្ញា ឆ្នាំ២០២៤ តែវិធានការនេះ មិនអនុវត្តចំពោះគម្រោងវិនិយោគមានលក្ខណៈ សម្បត្តិគ្រប់គ្រាន់ (គ.ល.គ) ដែលនាំចូលទំនិញខាងលើ សម្រាប់ប្រើប្រាស់ជាធាតុចូលផលិតកម្ម សម្រាប់ការនាំចេញឡើយ» ។
វិធានការនេះដែរ ធ្វើឡើងដោយយោងតាមការសម្រេចដ៏ខ្ពង់ខ្ពស់របស់សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ចុះថ្ងៃទី៩ ខែមករា ឆ្នាំ២០២៤។ ផលិតផលដែលត្រូវបានហាមឃាត់នេះ មានដូចជា អណ្តាតគោ និងក្របីបង្កក, ថ្លើមគោក្របីបង្កក, គ្រឿងក្នុងគោបង្កកផ្សេងៗ, ថ្លើមសត្វមាន់បង្កក, សាច់ និងគ្រឿងក្នុងមាន់បង្កក ។ ចំណែក ពោះវៀន , ប្លោក និងក្រពះទាំងមូល ឬជាផ្នែកនៃសត្វស្រស់ ក្លាស្សេ បង្កក ប្រឡាក់អំបិល ត្រាំទឹកអំបិល សម្ងួត ឬឆ្អើររួច ក៏ត្រូវហាមឃាត់ដែរ។
សូមជម្រាបថា កន្លងមកនេះ មន្ត្រីជំនាញបានធ្វើចុះឆែកឆេរ នៅទីតាំងស្តុកលក់ បានរកឃើញមានការលួចស្តុក នូវគ្រឿងនាំចូលដែលធ្វើឲ្យប៉ះពាល់សុខភាព សម្រាប់លក់ចែកចាយនៅលើកទីផ្សារ ក្នុងប្រទេសកម្ពុជា ជាបន្តបន្ទាប់ ។ សារធាតុដែលធ្វើឲ្យប៉ះពាល់នោះ ត្រូវបានដាក់ក្នុងបន្លែ សាច់ ដើម្បីរក្សាគុណភាពទុកបានរយៈពេលយូរ។ ការរកឃើញនេះហើយ ត្រូវបានប្រព័ន្ធផ្សព្វផ្សាយ ធ្វើការផ្សាយជាសាធារណៈ ត្រូវបានប្រជាពលរដ្ឋមានការព្រួយ និងពិបាកក្នុងការសម្រេចចិត្តទិញយកមកទទួលទាន ៕
