ក្រុមបាល់បោះរទេះនារីកម្ពុជា ឡើងវគ្គផ្ដាច់ព្រ័ត្រជួបចិន ដណ្ដើមកៅអីទៅប៉ារ៉ាឡាំពិក ឆ្នាំ២០២៤ នៅបារាំង
(ភ្នំពេញ)៖ ក្រុមបាល់បោះរទេះនារីជម្រើសជាតិកម្ពុជា បានឡើងវគ្គផ្ដាច់ព្រ័ត្រ ក្នុងព្រឹត្តិការណ៍ប្រកួតកីឡាបាល់បោះរទេះជើងឯកតំបន់អាស៊ី-អូសេអានី (IWBF Asia Oceania Championships) ឆ្នាំ២០២៤ និងវគ្គជម្រុះព្រឹត្តិការណ៍ប៉ារ៉ាឡាំពិក-ប៉ារីស ឆ្នាំ២០២៤ នៅទីក្រុងបាងកក ប្រទេសថៃ ក្រោយបន្ដដណ្ដើមបានជ័យជម្នះ ២ប្រកួតផ្ទួនៗទៀត នៅព្រលប់ថ្ងៃទី១១ ខែមករា ឆ្នាំ២០២៤ នេះ។
បន្ទាប់ពីយកឈ្នះក្រុមអូស្ដ្រាលី ឥណ្ឌា និងម្ចាស់ផ្ទះថៃ ដើម្បីឈរលេខ១ ពូលB កាលពីម្សិលមិញ ក្រុមបាល់បោះរទេះនារីកម្ពុជា ធ្វើបានកាន់តែល្អ ដោយបានយកឈ្នះក្រុមបាល់បោះរទេះនារីឡាវ ក្នុងលទ្ធផល ១៤-៤ ក្នុងវគ្គ ៨ក្រុមចុងក្រោយ មុនបន្ដយកឈ្នះក្រុមម្ចាស់ផ្ទះថៃ ដោយលទ្ធផល ៧-៤ ក្នុងវគ្គពាក់កណ្ដាលផ្ដាច់ព្រ័ត្រ នៅរាត្រីថ្ងៃព្រហស្បតិ៍នេះ ដែលនាំឲ្យក្រុមកម្ពុជា ឡើងទៅវគ្គផ្ដាច់ព្រ័ត្រ ដោយត្រូវជួបក្រុមចិន ដែលបានយកឈ្នះអូស្ដ្រាលី ៨-១ ក្នុងវគ្គពាក់កណ្ដាលផ្ដាច់ព្រ័ត្រ ។
សម្រាប់វគ្គផ្ដាច់ព្រ័ត្រ ក្រុមបាល់បោះរទេះនារីកម្ពុជា គ្រោងនឹងធ្វើការប្រកួតជាមួយក្រុមបាល់បោះរទេះនារីចិន នាព្រឹកថ្ងៃទី១២ ខែមករា ឆ្នាំ២០២៤ ស្អែក ។
ព្រឹត្តិការណ៍ ប្រកួតជើងឯកបាល់បោះរទេះជើងឯកតំបន់អាស៊ី-អូសេអានី (Bangkok 3×3 Wheelchair Basketball AOZ Cup) និងវគ្គជម្រុះព្រឹត្តិការណ៍កីឡាប៉ារ៉ាឡាំពិក ឆ្នាំ២០២៤ (Paris 2024 Paralympics Games) ធ្វើឡើងនៅទីក្រុងបាងកក ប្រទេសថៃ ចាប់ដំណើរការពីថ្ងៃទី៩ ដល់ថ្ងៃទី២១ ខែមករា ឆ្នាំ២០២៤។
ចំពោះក្រុមទទួលជើងឯក នឹងទទួលបានកៅអីទៅព្រឹត្តិការណ៍ប៉ារ៉ាឡាំពិក ឆ្នាំ២០២៤ (Paris 2024 Paralympics Games) នៅទីក្រុងបារីស ប្រទេសបារាំង។ ខណ:ក្រុមចំណាត់ថ្នាក់លេខ២ និងលេខ ៣ នឹងទទួលបានកៅអីទៅប្រកួតជើងឯក 2024 IWBF Women’s Repechage នៅទីក្រុង Osaka ប្រទេសជប៉ុន៕
