សម្តេចនាយកដ្ឋន្រ្តី ប្រភពទិន្នន័យមានសារសំខាន់ណាស់ វាជាផែនទីត្រីវិស័យជួយឱ្យយើងសម្រេចចិត្តបានត្រឹមត្រូវ គ្រប់ជ្រុងជ្រោយ មិនសម្រេចចិត្តដោយប្រថុយប្រថាន
នៅក្នុងពិធីប្រកាសផ្សព្វផ្សាយ “របាយការណ៍ថ្នាក់ជាតិ ស្តីពី លទ្ធផលចុងក្រោយនៃជំរឿន សេដ្ឋកិច្ចនៅព្រះរាជាណាចក្រកម្ពុជា ឆ្នាំ២០២២” នាព្រឹកថ្ងៃទី ១២ ធ្នូនេះ សម្តេចនាយកដ្ឋន្រ្តី ហ៊ុន ម៉ាណែត បានលើកឡើងថា ប្រភពទិន្នន័យមានសារសំខាន់ណាស់ វាជាផែនទីត្រីវិស័យជួយឱ្យយើងសម្រេចចិត្តបានត្រឹមត្រូវ គ្រប់ជ្រុងជ្រោយ មិនសម្រេចចិត្តដោយប្រថុយប្រថាន។
សម្តេចធិបតី ហ៊ុន ម៉ាណែត បានអោយដឹងថា ផែនទី មានន័យថា ឱ្យយើងដឹងពីភូមិសាស្រ្តទាំងនៅលើដី និងភូមិសាស្រ្តនយោបាយ សេដ្ឋកិច្ច ធុរកិច្ច ជាពិសេសស្ថានភាពនៅជុំវិញខ្លួនយើង។ ដោយឡែក ត្រីវិស័យ ឱ្យយើងដឹងពីទីតាំងថា នៅចំណុចណានៅលើផែនទីភូមិសាស្រ្តនេះ។ ប្រសិនបើគ្មានទិន្នន័យ គឺងាយនឹងវង្វេងវង្វាន់ មិនអាចដឹងពីស្ថានភាពនៅជុំវិញខ្លួន និងមិនអាចព្យាការណ៍ពីថ្ងៃខាងមុខបានទេ។
សម្តេចនាយករដ្ឋមន្រ្តី ក្រុមហ៊ុនជាច្រើននៅលើពិភពលោក បានវិនិយោគទៅលើប្រព័ន្ធទិន្នន័យ។ សម្តេច ហ៊ុន ម៉ាណែតសង្កត់ធ្ងន់ថា «ទិន្នន័យល្អ ទី១ ជួយឱ្យយើងសម្រេចចិត្តបានត្រឹមត្រូវ គ្រប់ជ្រុងជ្រោយ មិនសម្រេចចិត្តដោយប្រថុយប្រថាន, ទី២ ការព្យាករណ៍សេណារីយ៉ូ ពីអនាគតថាតើមានការប្រែប្រួលកម្រិតណា…បើយើងមិនអាចព្យាករណ៍បានថាតើស្ថានភាពនឹងទៅជាយ៉ាងណា យើងនឹងដើរក្រោយសភាពការណ៍ មិនអាចបុរេសកម្មភាពបានទេ នឹងត្រូវប្រតិកម្ម តែប្រតិកម្មហើយ ច្រើនតែលុបលាងបញ្ហា សម្អាតបញ្ហា បានន័យថា គោរួចទៅហើយទើបធ្វើក្រោលតាមក្រោយ»។
លោក ប៊ិន ត្រឈៃ រដ្ឋមន្ត្រីក្រសួងផែនការ បានលើកឡើងថា ជំរឿនសេដ្ឋកិច្ចឆ្នាំ២០២២ ត្រូវបានធ្វើឡើងគោលបំណងចងក្រងស្ថិតិមូលដ្ឋានគ្រឹះស្តីពីអង្គភាពសេដ្ឋកិច្ច និងបង្កើតបញ្ជីមេនៃអង្គភាពសេដ្ឋកិច្ចនៅកម្ពុជា ដែលផ្តល់នូវព័ត៌មានសំខាន់ៗស្តីពីស្ថានភាពនៃសកម្មភាព និងរចនាសម្ព័ន្ធសេដ្ឋកិច្ច ដល់អ្នករៀបចំគោលនយោបាយ អ្នករៀបចំផែនការ អ្នកស្រាវជ្រាវ និងអ្នកពាក់ព័ន្ធដទៃទៀត។ បញ្ជីមេនៃអង្គភាពសេដ្ឋកិច្ចក៏ត្រូវបានប្រើប្រាស់ជាបញ្ជីគោលនៃជំរឿនសេដ្ឋកិច្ច និងធ្វើជាបញ្ជីសំណាកគំរូ សម្រាប់ជ្រើសរើសសំណាកគំរូនៃអង្កេតផ្សេងៗពាក់ព័ន្ធនឹងក្រុមហ៊ុន សហគ្រាសអាជីវកម្ម សិប្បកម្ម ពាណិជ្ជកម្ម និងសេវាកម្ម លើកលែងតែអង្គភាពសេដ្ឋកិច្ចក្នុងវិស័យកសិកម្ម៕
