ម្ចាស់ឡានខ្លាញ់គោទី៣ ពីប៊ូសស្រ្តង បានទៅលើកីឡាករគុនខ្មែរ លន បញ្ញា
កីឡាករប្រដាល់ លន បញ្ញា បានក្លាយជាម្ចាស់រង្វាន់រថយន្តថ្មីសន្លាងពីប៊ូសស្ត្រងទី៣ បន្ទាប់ពីបានផ្តួលដៃគូ២រូបក្នុងទឹកទី២ដូចគ្នាក្នុងមួយរាត្រី នៅសង្វៀនបាយ័ន យប់ថ្ងៃទី១៤ ខែធ្នូ ឆ្នាំ២០២៣។
នៅជុំដំបូង លន បញ្ញា ធ្វើបានយ៉ាងល្អតាមរយៈកណ្តាប់ដៃ និងរន្ទះជើងផ្តួលកីឡាករថៃ Sibsongpana Kiatwinai ឲ្យសន្លប់ក្នុងទឹកទី២។ ក្រោយពីឆ្លងកាត់ការវាយតម្លៃដោយសារគាំទ្រពីមហាជនទាំងក្នុងហ្វេសប៊ុក និងសារ SMS ឃើញថាកីឡាករគុនខ្មែរ មឿន សុខហ៊ុច និង លន បញ្ញា ទទួលបានសារគាំទ្រច្រើនជាងគេ ដែលត្រូវប្រកួតគ្នាផ្ដាច់ព្រ័ត្រដណ្ដើមឡានពីប៊ូសស្រ្តង។ នៅវគ្គផ្តាច់ព្រ័ត្រ លន បញ្ញា នៅតែធ្វើបានល្អទៀតដោយបានផ្តួល មឿន សុខហ៊ុច ឲ្យបោះបង់ចោលការប្រកួតក្នុងទឹកទី២តាមរយៈការទាត់ឲ្យខូចដៃ ប៉ុន្តែនៅទឹកទី១ទទួលរងកណ្តាប់ដៃគួរឲ្យកត់សំគាល់ពី សុខហ៊ុច។
ជាលទ្ធផលចប់ការប្រកួត ប៊ូសស្រ្តងបានរកឃើញអ្នកខ្លាំងគុនខ្មែរ ដែលក្លាយជាម្ចាស់ឡានខ្លាញ់គោ គឺកីឡាករគុនខ្មែរ លន បញ្ញា។ រីឯកីឡាករគុនខ្មែរ មឿន សុខហ៊ុច ក្រោយប្រកួតចាញ់ លន បញ្ញា ក្នុងទឹកទី២ ប៊ូសស្រ្តងចិត្តល្អឧបត្ថម្ភទឹកប្រាក់ ៤លានរៀល និង ២លានរៀលដល់កីឡាករគុនខ្មែរដែលជាបេក្ខភាពដណ្ដើមឡាន ២ រូបទៀតជាការលើកទឹកចិត្ត។
បើគិតពីស្ថិតិប្រកួតគុនខ្មែរប្រមាណ៣ឆ្នាំចុងក្រោយ លន បញ្ហា មិនធ្លាប់បរាជ័យឡើយ ទោះជាប៉ះដៃគូជាមិត្តរួមជាតិ ឬបរទេសក៏ដោយ។ លើកលែងតែការប្រកួតជំនាញឃីកបុកស៊ីងដែលរូបគេធ្លាប់ចាញ់ក្នុងរយៈពេលពីរបីឆ្នាំចុងក្រោយនេះដូចជាការប្រកួតក្នុងកីឡាស៊ីហ្គេម និងឃីកបុកស៊ីងជើងឯកអាស៊ីជាដើម៕
