១១ខែឆ្នាំ២០២៣ ទំហំពាណិជ្ជកម្មរវាងកម្ពុជា-វៀតណាម សម្រេចបានជាង ៥,៨ពាន់លានដុល្លារ
គិតត្រឹមខែវិច្ឆិកា ឆ្នាំ ២០២៣ ទំហំពាណិជ្ជកម្មរវាងកម្ពុជា-វៀតណាម សម្រេចបានជាង ៥,៨ពាន់លានដុល្លារ កើនឡើង ៦,៦ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២ មានចំនួនជាង ៥,៥ពាន់លានដុល្លារអាមេរិក វៀតណាមជាប់លំដាប់លេខរៀងទី៣ ក្នុងការដោះដូរទំនិញជាមួយកម្ពុជា បន្ទាប់ពីចិន និងអាមេរិក។
យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា បានអោយដឹងថា ការនាំចេញរបស់កម្ពុជា ទៅវៀតណាម ពីខែមករា ដល់ខែវិច្ឆិកា ឆ្នាំ ២០២៣ មានទំហំជាង ២,៦១ពាន់លានដុល្លារ និងនាំចូលមកវិញមានចំនួនទឹកប្រាក់ជាង ៣,២ពាន់លានដុល្លារ។ ក្នុងនោះ ទំនិញដែលកម្ពុជានាំចេញសំខាន់ៗភាគច្រើនជាផលិតផលកសិកម្ម មានដូចជា ស្រូវ ដំឡូងមី ស្វាយចន្ទី និងកៅស៊ូជាដើម ខណៈការនាំចូលវិញមានដែកថែប ប្រេងឥន្ធនៈ និងផលិតផលវាយនភណ្ឌ។
ទន្ទឹមនឹងកំណើនពាណិជ្ជកម្មរវាងប្រទេសទាំងពីរ កាលពីថ្ងៃទី ១១ ខែធ្នូ សម្តេចនាយករដ្ឋមន្រ្តី ហ៊ុន ម៉ាណែត បានធ្វើដំណើរទស្សនកិច្ចទៅប្រទេសវៀតណាម ដើម្បីពង្រឹងទំនាក់ទំនងឱ្យកាន់តែរីកចម្រើនរឹងមាំ ស្របតាមស្មារតីនៃភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង។
តាមរយៈជំនួបទ្វេភាគី នៅថ្ងៃទី១១ ធ្នូ លោកនាយករដ្ឋមន្ត្រីវៀតណាម បានសម្តែងការជឿជាក់ថា ក្រោមការដឹកនាំរបស់ សម្តេចធិបតី ហ៊ុន ម៉ាណែត នាវាកម្ពុជានឹងកាន់តែអភិវឌ្ឍន៍ខ្លាំងក្លាទៅមុខបន្ថែមទៀត សំដៅឆ្ពោះទៅសម្រេចចក្ខុវិស័យប្រែក្លាយកម្ពុជា ជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងប្រាក់ចំណូលកម្រិតខ្ពស់នៅឆ្នាំ២០៥០ ជាក់ជាមិនខាន។
ភាគីទាំងពីរ ក៏បានពិភាក្សាលើការដាក់ចេញនូវទិសដៅក្នុងការបន្តពង្រឹង និងពង្រីកកិច្ចសហប្រតិបត្តិការលើគ្រប់វិស័យឱ្យទទួលបានលទ្ធផលជាផ្លែផ្កាបន្ថែមទៀត ដើម្បីផលប្រយោជន៍ទៅវិញទៅមកសម្រាប់ជាតិ និងប្រជាជនប្រទេសទាំងពីរ ជាពិសេសវិស័យនយោបាយ ពាណិជ្ជកម្ម វិនិយោគ ទេសចរណ៍ សុខាភិបាល អប់រំ ការងារខណ្ឌសីមា និងការបោះបង្គោលព្រំដែន ជាដើម៕
