ជំនួយការកំពូល របស់មេបញ្ជាការយោធាអ៊ុយក្រែន ស្លាប់នៅថ្ងៃខួបកំណើត ដោយសារផ្ទុះគ្រាប់បែក ក្នុងកាដូ

លោក Valeriy Zaluzhnyy មេបញ្ជាការនៃកងកម្លាំងប្រដាប់អាវុធអ៊ុយក្រែន បាននិយាយក្នុងសេចក្តីថ្លែងការណ៍ ថា លោកឧត្តមសេនីយ៍ Hennadiy Chastyakov ត្រូវបានសម្លាប់ដោយសារគ្រាប់បែក ដែលផ្ទុះចេញពីកាដូថ្ងៃខួបកំណើតរបស់គាត់។ រូបថតដែលថតបានពីខាងក្នុងផ្ទះរបស់លោក Chastyakov បង្ហាញពីវត្ថុរាងដូចគ្រាប់បែកដៃជាច្រើន ដែលនៅរាយប៉ាយជិតប្រអប់ស្រា។

ដោយឡែក តាមការបង្ហោះ តេឡេក្រាម ពីរដ្ឋមន្ត្រីមហាផ្ទៃអ៊ុយក្រែន លោក Ihor Klymenko បានឲ្យដឹងថា ការផ្ទុះនេះ គឺបណ្តាលមកពីកាដូមួយ ដែលមានផ្ទុកគ្រាប់បែកដៃចំនួន៦គ្រាប់ ប្រគល់ដោយសហការីរបស់គាត់។ ក្រោយហេតុការណ៍នេះ ប៉ូលិស​​បាន​រក​ឃើញ​គ្រាប់បែក​ដៃចំនួន​៥​គ្រាប់​ទៀត ​នៅ​ក្នុង​ផ្ទះ​របស់លោក Chastyakov ហើយការស៊ើបអង្កេតក៏បានចាប់ផ្តើមឡើង៕