អ្នកកាសែតជើងចាស់កម្ពុជាស្នើចិនថតភាពយន្ត«No More Bets»វគ្គ២ដើម្បីជួយស្តារវិស័យទេសចរណ៍កម្ពុជា

«No More Bets» គឺជាខ្សែភាពយន្តឧក្រិដ្ឋកម្មតាមអ៊ីនធឺណិតដែលរៀបរាប់ពីរឿងរ៉ាវមនុស្ស ត្រូវបានជួញដូរទៅក្រៅប្រទេស និងបង្ខំឱ្យបោកប្រាស់តាមអ៊ីនធឺណិត។ ក្នុងភាពយន្តនេះ កម្ពុជាត្រូវបានគេបង្ហាញដោយប្រយោលថាជាប្រទេសដ៏មានគ្រោះថ្នាក់មួយ។ កាលពីចុងខែកញ្ញាកន្លងទៅ ក្រសួងវប្បធម៌ និងសិល្បៈនៃប្រទេសកម្ពុជា បានផ្ញើលិខិតទៅអាជ្ញាធរពាក់ព័ន្ធរបស់ប្រទេសចិន ដើម្បីដកភាពយន្តនេះពីការចាក់បញ្ចាំង ព្រោះវាបានធ្វើឱ្យយខូចកេរ្តិ៍ឈ្មោះប្រទេសកម្ពុជា។

ក្នុងវេទិកាដែលមានការចូលរួមពីមន្ត្រីបណ្ឌិត្យសភាវិទ្យាសាស្ត្រសង្គមចិន, លោក ពុយ គា បានលើកឡើងថា «កម្ពុជាត្រូវបានគេមើលឃើញថាជាអ្នករងគ្រោះមួយដោយសារខ្សែភាពយន្ត No More Bets។ ដូច្នេះ ខ្ញុំសូមយកឱកាសនេះធ្វើការផ្ដល់យោបល់ថា តើយើង [កម្ពុជា-ចិន] អាចជួយស្ដារទំនុកចិត្តនេះឡើងវិញបានដោយរបៀបណា»។

លោកបានបន្ថែមថា «ក្នុងនាមជាប្រធានក្លឹបអ្នកកាសែតកម្ពុជា ខ្ញុំអាចសាកល្បងធ្វើជាស្ពានតភ្ជាប់ ដើម្បីឱ្យអ្នកផលិតខ្សែភាពយន្តរឿង No More Bets អាចមកផលិតវគ្គ២នៅកម្ពុជាដោយថតនៅខេត្តព្រះសីហនុ ដើម្បីមើលឃើញពីស្ថានភាពជាក់ស្តែងរបស់ខេត្ត»។ ទន្ទឹមនឹងនេះ លោកបានបន្ថែមថា៖ «ទោះជាយ៉ាងណា ការថតរឿងនឹងមិនអាចធ្វើទៅបាននៅថ្ងៃស្អែក ឬថ្ងៃបន្ទាប់នោះទេ ប៉ុន្តែអាចក្នុងរយៈពេល៣ខែ ឬ៦ខែ»។