កីឡាអាស៊ីប៉ារ៉ាហ្គេម ! ក្រុមបាល់បោះពិការនារីកម្ពុជា ឈ្នះ ឡាវ ៦៥-៣៥
អាស៊ីប៉ារ៉ាហ្គេម៖ ព្រឹត្តិការណ៍កីឡាអាស៊ីប៉ារ៉ាហ្គេម លើកទី៤ នៅប្រទេសចិន ក្រុមកីឡាការិនីបាល់បោះពិការជម្រើសជាតិកម្ពុជា បានប្រកួតឈ្នះក្រុមនារីជម្រើសជាតិឡាវ ដោយលទ្ធផល ៦៥-៣៥ ក្នុងវគ្គវិលជុំសន្សំពិន្ទុ។
ការប្រកួតវគ្គវិលជុំសន្សំពិន្ទុនេះ ក្រុមនារីកម្ពុជាត្រូវបន្តប្រកួតជាមួយក្រុមនារីជប៉ុន នៅថ្ងៃទី២០ ខែតុលា និងប៉ះម្ចាស់ផ្ទះចិននៅថ្ងៃទី២១ ខែតុលា។ សម្រាប់វិញ្ញាសាបាល់បោះនារីពិការនេះមាន៦ប្រទេសចូលរួមរួមមានគឺ កម្ពុជា ចិន អ៉ីរ៉ង់ ជប៉ុន ឡាវ និងថៃ។
សិតទី១កម្ពុជា ឈ្នះ ឡាវ ដោយពិន្ទុ ១៧-៦, សិតទី២ ឈ្នះដោយពិន្ទុ ១៧-៥, សិតទី៣ ឈ្នះដោយពិន្ទុ ១៦-១៤ និងសិតទី៤ ឈ្នះដោយពិន្ទុ ១៥-១០ ដូច្នេះកម្ពុជាទទួលបានជ័យជម្នះដោយពិន្ទុសរុប ៦៥-៣៥។ បន្ទាប់ពីចប់វគ្គសន្សំពិន្ទុ ក្រុមឈរលេខ១ និងលេខ២ ត្រូវប្រកួតគ្នាដណ្តើមមេដាយមាស ខណៈក្រុមឈរលេខ៣ និងលេខ៤ត្រូវប្រកួតដណ្តើមមេដាយសំរិទ្ធ ខណៈក្រុមឈរលេខ៥ និងលេខ៥ ត្រូវប្រកួតគ្នាដណ្តើមចំណាត់ថ្នាក់លេខ៥៕
សមាជិកក្រុមកីឡាការិនីពិការបាល់បោះកម្ពុជាមាន កីឡាការិនី អាន ស្រីណែន (ប្រធានក្រុម) កីឡាការិនី ហ៊ូ ចន្ធី, ឡា សាវរីយ៍, សឿម ដា, សាន រដ្ឋា, ដួង ច័ន្ទរក្សា, ឯក ស្រីមុំ, ភួង ភួស, សៀង សុខច័នុ្ទ, ម៉ៅ អែត, តៅ ចាន់ដា និង តុន តុម។ លោក ម៉ៅ សុជា ជាគ្រូបង្វឹក និងលោក ម៊ុយ សឿ គ្រូជំនួយ៕
