ក្រុមហ៊ុនប៊ូសស្ត្រង់ ផ្តល់ប្រាក់រង្វាន់លើកទឹកចិត្តចំនួន១០០លានរៀល ដល់ព្រំ សំណាង ដើម្បីត្រៀមជួប ដាវ លីឌុច
គុនខ្មែរ៖ ដើម្បីត្រៀមខ្លួនឲ្យបានល្អឥតខ្ចោះសម្រាប់ការប្រកួតធំសំខាន់នាខែវិច្ឆិកា ឆ្នាំ២០២៣ ខាងមុខ ជើងខ្លាំងគុនខ្មែរទម្ងន់ធ្ងន់មធ្យម ព្រំ សំណាង ទទួលបានការឧបត្ថម្ភគាំទ្រយ៉ាងពេញទំហឹងពីក្រុមហ៊ុនប៊ូសស្ត្រង់។
នៅយប់ថ្ងៃទី១១ ខែតុលា ឆ្នាំ២០២៣ ព្រំ សំណាង បានទទួលជ័យជម្នះដោយពិន្ទុលើកីឡាករអ៊ុយក្រែន Vladyslav បន្ទាប់ពីតស៊ូគ្នា៣ទឹកពេញ។ តាមរយៈជ័យជម្នះនេះ ភេសជ្ជៈប៊ូសស្ត្រង បានផ្តល់ប្រាក់រង្វាន់លើកទឹកចិត្តចំនួន១០០លានរៀល (២៥០០០ដុល្លារអាមេរិក) ដល់ ព្រំ សំណាង។ ការផ្តល់ប្រាក់រង្វាន់ដ៏ច្រើនសន្ធឹកសន្ធាប់មិនធ្លាប់មាននេះគឺជាការលើកទឹកចិត្ត និងជួយទំនុកបម្រុងឲ្យអ្នកលេងគុនខ្មែររូបនេះត្រៀមខ្លួនឲ្យបានល្អសម្រាប់ការប្រកួតអន្តរជាតិធំដ៏សំខាន់នាពេលខាងមុខ។
មុនពេលការប្រកួតជាមួយកីឡាករ ដាវ លីឌុច ក្រុមហ៊ុនប៊ូសស្ត្រង់បានរៀបចំកន្លែងដ៏ហ្វឹកហាត់ថ្មីស្អាតបំពាក់ដោយសម្ភារ និងឧបករណ៍គ្រប់គ្រាន់ដែលស្ថិតនៅផ្សារទំនើបអូឡាំព្យា។ ក្រៅពីនេះ ក្រុមហ៊ុនប៊ូសស្ត្រង់បានរៀបចំគ្រូបង្វឹកចំនួន១០រូបដើម្បីជួយពង្រឹងសមត្ថភាពរបស់ ព្រំ សំណាង ដូចជា ក្បាច់ ស្នៀតប្រយុទ្ធ បច្ចេកទេស កម្លាំងស៊ុហ្វ ស្មារតី ចិត្តសាស្ត្រ ម្ហូបអាហារ ការថែទាំសុខភាព និងកាយសម្បទាជាដើម។
ការឧបត្ថម្ភគាំទ្រ និងទំនុកបម្រុងពេញលក្ខណៈបែបនេះគឺដើម្បីឲ្យ ព្រំ សំណាង ផ្តោតលើតែការហ្វឹកហាត់តែម្យ៉ាងគត់ឲ្យបានដិតដល់ និងល្អឥតខ្ចោះដើម្បីប្រកួតមិត្តភាពអន្តរជាតិដ៏ធំបំផុតជាមួយស្តេចប្រដាល់មីយ៉ាន់ម៉ា Dave Leduc នាខែវិច្ឆិកា ឆ្នាំ២០២៣ ខាងមុខនេះ៕
រូបពី ៖ 25 Sport
