ដឹងមូលហេតុដែលឧកញ៉ាឈាង រ័ត្នស្វាមីស្រីអូនសម្រស់ធម្មជាតិបញ្ចប់ជីវិតខ្លួនឯងហើយ
(ភ្នំពេញ)៖ ដំណឹងមរណភាពរបស់ឧកញ៉ា ឈាង រ័ត្ន ដែលត្រូវជាស្វាមីអ្នកស្រី នួន ស៊ុន្ទរី ដែលគេស្គាល់ជាទូទៅថា ស្រីអូន សម្រស់ធម្មជាតិនោះ កំពុងតែធ្វើឱ្យមានការចាប់អារម្មណ៍យ៉ាងខ្លាំងក្នុងបណ្ដាញសង្គមនានា ខណៈអ្នកប្រើប្រាស់បណ្ដាញសង្គមចង់ដឹងអំពីមូលហេតុដែលនាំឱ្យឧកញ៉ារូបនេះទទួលមរណភាព។
សមត្ថកិច្ចបានបញ្ជាក់ច្បាស់ហើយ ឧកញ៉ា ឈាង រ័ត្ន អាយុ ៤០ឆ្នាំ បានបញ្ចប់ជីវិតដោយការចងកធ្វើអត្តឃាត នៅវេលាម៉ោង១៤៖៥០នាទី ថ្ងៃទី១១ ខែតុលា ឆ្នាំ២០២៣ នៅផ្ទះលេខ១៤២ ផ្លូវR12 គម្រោងរ៉ូសវីល បុរីប៉េងហួត ភូមិវាលស្បូវ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ។
បើតាមឈ្មោះ ម៉ៅ សុីវន ត្រូវជាប្អូនថ្លៃឧកញ៉ា ឈាង រ័ត្ន បានរៀបរាប់ឱ្យដឹងថា មុនពេលកើតហេតុពោលនៅវេលាម៉ោង ៨៖១០នាទីថ្ងៃទី១១ ខែតុលា ឆ្នាំ២០២៣ រូបខ្លួន និងគ្រួសារបានទៅធ្វើបុណ្យនៅខេត្តព្រៃវែង ចំណែកបងថ្លៃ គឺឧកញ៉ា ឈាង រ័ត្ន មិនបានទៅជាមួយឡើយ ដោយអះអាងថា ជាប់រវល់ទៅខេត្តកំពង់ចាម ដើម្បីមើលគ្រូចិនសែ។
ឈ្មោះ ម៉ៅ ស៊ីវន បន្តថា លុះរហូតដល់ម៉ោង ១៤៖៥០នាទីថ្ងៃដដែល ពេលខ្លួនត្រឡប់មកផ្ទះវិញ ក៏ឃើញរថយន្តឧកញ៉ា ឈាង រ័ត្ន ចតនៅខាងមុខផ្ទះ ពេលនោះរូបគេបានចាក់សោរចូលក្នុងផ្ទះរួចក៏ដើរទៅក្រោយផ្ទះ ហើយប្រទះឃើញបងថ្លៃ គឺឧកញ៉ា ឈាង រ័ត្ន ចងកនឹងខ្សែអង្រឹងជាប់ជណ្ដើរទ្វារក្រោយផ្ទះ។
ប្អូនថ្លៃរបស់ឧកញ៉ា ឈាង រ័ត្នដដែល បានលើកឡើងថា កន្លងមកឧកញ៉ា ឈាង រ័ត្ន ធ្លាប់មានវិបត្តិផ្លូវចិត្តលែងលះគ្រួសារថ្មីៗមិនទាន់ដាច់ស្រាច់។ តាមការពិនិត្យរបស់នគរបាលកោសលវិច្ច័យបច្ចេកទេសបានសន្និដ្ឋានថាជនរងគ្រោះខាងលើពិតជាធ្វើអត្តឃាតខ្លួនឯង ដោយយកខ្សែអង្រឹងចងកខ្លួនឯងពិតប្រាកដមែន។ បច្ចុប្បន្នសពជនរងគ្រោះ ត្រូវបានក្រុមគ្រួសារធ្វើបុណ្យតាមប្រពៃណីនៅផ្ទះកើតហេតុខាងលើ។
គួររម្លឹកថា ឧកញ៉ា ឈាង រ័ត្ន និងអ្នកស្រី នួន សុន្ទរី បានលរៀបអាពាហ៍ពិពាហ៍នឹងគ្នាកាលពីឆ្នាំ២០១៧ និងមានកូនស្រីម្នាក់ជាចំណងដៃ៕
