កំណាត់ផ្លូវជាតិលេខ៧៦ដែលបាក់ស្រុតកាលពីអំឡុងដើមខែសីហាស្ថាបនាឡើងវិញបាន៤៥%ហើយ
(ខេត្តមណ្ឌលគិរី)៖ ការស្ថាបនាផ្លូវតភ្ជាប់ផ្លូវលេខជាតិ៧៦ ដែលបានបាក់ស្រុតកាលពីពេលកន្លងមក ស្ថិតនៅក្នុងភូមិអណ្ដូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី ត្រូវបានមន្ទីរសាធារណកា និងដឹកជញ្ជូនខេត្តមណ្ឌលគិរី ស្ថាបនាឡើងវិញបាន៤៥ភាគរយហើយ។ នេះបើតាមការបញ្ជាក់របស់លោក រស់ គឹមធន ប្រធានមន្ទីរសាធារណការ និងដឹកជញ្ជូនខេត្តមណ្ឌលគិរី នៅរសៀលថ្ងៃទី០៦ ខែតុលា ឆ្នាំ២០២៣នេះ។
បើតាមមន្ទីរសាធារណកា និងដឹកជញ្ជូនខេត្តមណ្ឌលគិរីបញ្ជាក់ថា កំណាត់ផ្លូវជាតិលេខ៧៦ ដែលបានដាក់ស្រុតដោយសារការរអិលបាក់ដីនេះ មានប្រវែង ៤២៥ម៉ែត្រ(ទទឹង១២ម៉ែត្រ)។
គួររម្លឹកថា កាលពីយប់ថ្ងៃទី០១ ខែសីហា ឆ្នាំ២០២៣ កំណាត់ផ្លូវជាតិលេខ៧៦ នៅត្រង់ចំណុចអូរងើយ ស្ថិតក្នុងភូមិអណ្ដូងក្រឡឹង ឃុំសែនមនោរម្យ ស្រុកអូររាំង នៃខេត្តមណ្ឌលគិរី ត្រូវបានផ្អាកចរាចរណ៍ជាបណ្តោះអាសន្ន ដោយសារការរអិលបាក់ដីចន្លោះ PK94+080 – PK94+150 និងបន្តមានស្នាមប្រេះបន្ថែមនៅថ្ងៃបន្ទាប់ ដែលសរុបការខូចខាតមានប្រវែង១៦៦ម៉ែត្រ(រអិលបាក់ដី ៧០ម និងស្នាមប្រេះ៩៦ម)។
ក្រោយហេតុការណ៍រអិលបាក់ដីនេះ លោក ស៊ុន ចាន់ថុល អតីតរដ្ឋមន្ត្រីក្រសួងសាធារណការនិងដឹកជញ្ជូន បានដាក់បទបញ្ជាយ៉ាងបន្ទាន់ទៅមន្ទីរសាធារណការនិងដឹកជញ្ជូនខេត្តមណ្ឌលគិរី និងខេត្តក្រចេះ ឱ្យបានបើកការដ្ឋានស្ថាបនាផ្លូវវាងកំណាត់ផ្លូវជាតិលេខ៧៦(ស្នួល-សែនមនោរម្យ)ដែលបានខូចខាតនេះ។ ក្រោយមក នៅថ្ងៃទី០៧សីហា ផ្លូវវាងថ្មីបានស្ថាបនាឡើង និងត្រូវបានប្រកាសឱ្យប្រជាពលរដ្ឋ ក៏ដូចជាអ្នកដំណើរអាចធ្វើចរាចរណ៍ជាបណ្តោះអាសន្ន ដែលមានគុណភាពស្របតាមបទដ្ឋាន និងផ្តល់សុវត្ថិភាពជំនួសឱ្យផ្លូវជាតិលេខ៧៦ដែលរងការខូចខាត។
ផ្លូវជាតិលេខ៧៦ ជាផ្លូវជាតិដែលតភ្ជាប់ពីស្រុកស្នួល ខេត្តក្រចេះដល់ក្រុងសែនមនោរម្យ ខេត្តមណ្ឌលគិរី មានប្រវែងសរុប១២៧គីឡូម៉ែត្រ ជាប្រភេទផ្លូវDBST បានចាប់ផ្ដើមការស្ថាបនា នៅក្នុងខែកុម្ភៈ ឆ្នាំ២០០៧ និងបញ្ចប់ការស្ថាបនា នៅក្នុងខែមីនា ឆ្នាំ២០១១ ដោយក្រុមហ៊ុន CRBC ចំណាយថវិកាសាងសង់ចំនួន ៥១,៩០០,០០០ដុល្លារអាមេរិក។ ផ្លូវនេះបានសម្ពោធបើកឱ្យប្រើប្រាស់ជាផ្លូវការ កាលពីថ្ងៃទី៣១ ខែមករា ឆ្នាំ២០១២៕
