សម្តេចហ៊ុន ម៉ាណែត សួរទៅកាន់អភិបាលខេត្តសៀមរាប ថាតើចំនួនភ្ញៀវទេសចរបរទេស កើនឡើងប៉ុន្មានឲ្យពិតប្រាកដ?

ភ្នំពេញ៖ ចំនួនភ្ញៀវទេសចរបរទេស មកកាន់ប្រទេសកម្ពុជា មានការធ្លាក់ចុះដោយ សារការរាតត្បាតជំងឺកូវីដ-១៩ ប៉ុន្ដែបច្ចុប្បន្នមានចំនួនកើនឡើងបន្តិចវិញហើយ សម្ដេចនាយករដ្ឋមន្ត្រី ​បានសាកសួរទៅកាន់អភិបាលខេត្តសៀមរាប ថាតើចំនួនភ្ញៀវទេសចរបរទេស កើនឡើងប៉ុន្មានឲ្យពិតប្រាកដ?

ថ្លែងក្នុងឱកាសអញ្ជើញជួបសំណេះសំណាលជាមួយកម្មករ-និយោជិត ប្រមាណជិត២ម៉ឺននាក់ នៅតាមបណ្តារោងចក្រ-សហគ្រាស នៅរាជធានីភ្នំពេញ នាថ្ងៃទី៣ ខែតុលា ឆ្នាំ២០២៣ សម្ដេចធិបតី បានថ្លែងថា​ វិបត្តិកូវីដ ធ្វើឲ្យប៉ះពាល់ដល់ចំនួនទេសចរណ៍​ទាំងកម្ពុជានិងថៃ​ដូចតែគ្នា។ ជាមួយគ្នាសម្ដេចបានសាកសួរទៅកាន់ភាគីថៃកាលពីពេលថ្មីៗនេះថាបានប៉ុន្មានភាគរយ? សម្ដេចថាថៃកាលមុនកូវីដ ៤០លាននាក់ ប៉ុន្ដែឥឡូវកើនវិញបានត្រឹមប្រហែល ៦០%ប៉ុណ្ណោះ​ ដែលនេះសឲ្យឃើញថា គ្រប់ប្រទេសទាំងអស់ប៉ះពាល់។

ជាមួយគ្នានេះ សម្ដេចនាយករដ្ឋមន្ត្រី ​បានសាកសួរទៅកាន់អភិបាលខេត្តសៀមរាប ថាតើចំនួនភ្ញៀវទេសចរបរទេស កើនឡើងប៉ុន្មានឲ្យពិតប្រាកដ? ដោយសម្ដេចបន្ថែមថា រឿងទិ​ន្នន័យរបស់ក្រសួងទេសចរណ៍ជារឿងមួយ តែសម្ដេចចង់ដឹងបន្ថែមពីអាជ្ញាធរផ្ទាល់ នៅខេត្តសៀមរាប។

សូមបញ្ជាក់ផងដែរថា តាមរយៈសេចក្ដីប្រកាសព័ត៌មាន របស់គ្រឹះស្ថានអង្គរ បានអោយដឹងថា រយៈពេល៩ខែ ពោលចាប់ពីខែមករា ដល់ខែកញ្ញា ឆ្នាំ២០២៣នេះ កម្ពុជារកចំណូលបានចំនួន ២៤,៩៥៥,៣៩៧ដុល្លារអាមេរិក ពីការលក់បណ្ណចូលទស្សនារមណីយដ្ឋានអង្គរ ដែលមានភ្ញៀវទេសចរបរទេសចំនួនសរុប ៥៣៩,៥៦១នាក់៕