ផ្លូវល្បឿនលឿនភ្នំពេញ-ព្រះសីហនុរកចំណូលបាន៣២លានដុល្លារ
លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការនិងដឹកជញ្ជូន បញ្ជាក់ថា គិតចាប់ពីខែវិច្ឆិកា ឆ្នាំ២០២២ មកទល់នឹងខែកញ្ញា ឆ្នាំ២០២៣នេះ ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ រកចំណូលបានប្រមាណ ៣២លានដុល្លារអាមេរិក និងនៅត្រឹមរយៈពេល៩ខែ ឆ្នាំ២០២៣នេះ រាប់ចាប់ពីខែមករា ដល់ខែកញ្ញា រកចំណូលបានប្រមាណ ២៧លានដុល្លារអាមេរិក។
អ្នកនាំពាក្យដដែលបានឱ្យដឹងថា គិតត្រឹមរយៈពេល៩ខែ ចាប់ពីខែមករា ដល់ខែកញ្ញា ឆ្នាំ២០២៣នេះ មានយានយន្តចំនួនប្រមាណ៣លានគ្រឿង បានចរាចរណ៍លើផ្លូវល្បឿនលឿនភ្នំពេញ-ក្រុងព្រះសីហនុ។ លោកបញ្ជាក់ថារយៈពេល៩ខែ ចុងក្រោយនេះ មានគ្រោះថ្នាក់ចរាចរណ៍កើតឡើងប្រមាណ២៥០ករណី រួមមាន៖ អ្នកស្លាប់៤នាក់ រងរបួស៣៣នាក់ និងមានសេវាប្រតិបត្តិការសង្គ្រោះចំនួនប្រមាណ៣០០០ដង។
លោកកត់សម្គាល់ផងដែរថា តួលេខនេះបង្ហាញថា ជាមធ្យមគ្រោះថ្នាក់ចរាចរណ៍កើតឡើងតិចជាងមួយដងក្នុងមួយថ្ងៃ។ បើប្រៀបធៀបទៅនឹងផ្លូវផ្សេងៗដែលមានចរាចរណ៍មមាញឹកដូចគ្នា ឃើញថាផ្លូវល្បឿនលឿនភ្នំពេញ-ក្រុងព្រះសីហនុ ជាផ្លូវដែលមានសុវត្ថិភាពខ្ពស់ និងចំណេញពេលវេលាធ្វើដំណើរ។ យ៉ាងណាមិញ អ្នកនាំពាក្យរូបនេះ បានអំពាវនាវដល់ប្រជាពលរដ្ឋជាអ្នកបើកបរលើផ្លូវល្បឿនលឿនទាំងអស់មានការប្រុងប្រយ័ត្ន និងគោរពច្បាប់ចរាចរណ៍ឱ្យបានខ្ជាប់ខ្ជួន ដើម្បីសុខសុវត្ថិភាពទាំងអស់គ្នា។
សូមបញ្ជាក់ថា ផ្លូវល្បឿនលឿនពីភ្នំពេញ-ព្រះសីហនុមានប្រវែងសរុប១៨៧,០៥គីឡូម៉ែត្រ ត្រូវបានបើកការដ្ឋានសាងសង់ កាលពីថ្ងៃទី២២ ខែមីនា ឆ្នាំ២០១៩ក្នុងទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន (CRBC)ពីប្រទេសចិន តាមរយៈក្រុមហ៊ុន Cambodian PPSHV Expressway Co.,Ltd ដោយចំណាយការវិនិយោគប្រមាណ២ពាន់លានដុល្លារអាមេរិក និងហិរញ្ញប្បទានឥតសំណងពីរដ្ឋាភិបាលចិនប្រមាណ១៥០លានដុល្លារ។ ផ្លូវល្បឿនលឿនដំបូងបង្អស់នៅកម្ពុជានេះត្រូវបានប្រកាសដាក់ឱ្យដំណើរការជាផ្លូវការនៅថ្ងៃទី០១ ខែតុលា ឆ្នាំ២០២២៕
