Dave Leduc ៖ ហេតុអ្វី ព្រំ សំណាង មិនសន្លប់ ពេលត្រូវមួយកែងរបស់កីឡាករអាមេរិក
បន្ទាប់ពីព្រំ សំណាង ត្រូវបានកីឡាករអាមេរិក Pawell Bansak វាយត្រូវមួយកែងបក កាលពីយប់ថ្ងៃទី៣០ ខែកញ្ញា ឆ្នាំ២០២៣ មិនសន្លប់ កីឡាករប្រដាល់មីយ៉ាន់ម៉ា Dave Leduc បានចាប់អារម្មណ៍ចំពោះភាពរឹងមាំរបស់អ្នកលេងគុនខ្មែររូបនេះ…។
តាមរយៈទំព័រហ្វេសបុក ស្តេចប្រដាល់មីយ៉ាន់ម៉ា Leduc បានរៀបរាប់ថា ៖«ការប្រកួតរវាងកីឡាករអាមេរិក និង ព្រំ សំណាង ពិតជាគួរឱ្យធុញទ្រាន់។ ខ្ញុំគិតថា សំណាង មិនខ្វល់ពីការប្រកួតនេះទាល់តែសោះ ហើយគ្រាន់តែធ្វើតិចតួចបង្គ្រប់កិច្ច។ គេបានត្រឹមតែអោប ហើយមិនបានធ្វើអ្វីសោះទាំង៣ទឹក លើកលែងតែការវាយចេញដ៏គ្រោះថ្នាក់មួយរបស់កីឡាករអាមេរិកគឺកែងបក ប៉ុន្តែ ព្រំ សំណាង មិនទាំងដួលផង!»។
ស្តេចប្រដាល់មីយ៉ាន់ម៉ា Leduc បន្ថែមថា «គ្រូបង្វឹករបស់ខ្ញុំបានទូរសព្ទមកខ្ញុំ បន្ទាប់ពីការប្រកួត និងបាននិយាយថា គាត់ចាប់អារម្មណ៍ជាខ្លាំងចំពោះភាពរឹងមាំរបស់សំណាង។ គាត់មិនយល់ថា ហេតុអ្វី សំណាង មិនដួល បន្ទាប់ពីត្រូវកែងបក។ គាត់គឺជាអ្នកប្រយុទ្ធម្នាក់ដ៏រឹងមាំដែលគ្រូបង្វឹករបស់ខ្ញុំធ្លាប់បានជួប។ សូមទទួលការគោរពពីខ្ញុំ។ ខ្ញុំទន្ទឹងរង់ចាំជួបអ្នកនៅប្រទេសកម្ពុជា។ មិត្តភាពរវាងមីយ៉ាន់ម៉ា និងកម្ពុជា»។
តាមការគ្រោងទុក ព្រំ សំណាង នឹងប្រកួតជាមួយ Dave Leduc នាចុងខែវិច្ឆិកា ខាងមុខក្នុងជំនួបមិត្តភាពអន្តរជាតិដែលប្រើក្បាច់គុនខ្មែរ ប៉ុន្តែមានតែ១ទឹក៩នាទី៕
