សាច់ត្រីទីឡាព្យ៉ាគុណភាពខ្ពស់របស់សិប្បកម្ម Cambodia Fresh Farm កំពុងតែពេញនិយម និងកំពុងសម្លឹងទៅរកការនាំចេញទៅទីផ្សារក្រៅប្រទេស
កណ្តាល៖ សាច់ត្រីទីឡាព្យ៉ាគុណភាពខ្ពស់ដែលផលិតដោយសិប្បកម្ម Cambodia Fresh Farm ដោយប្រើប្រាស់បច្ចេកទេសជប៉ុន គឺកំពុងទទួលបានកាគាំទ្រពីប្រជាជនខ្មែរ និងជនបរទេស ហើយក៏កំពុងទទួលបានការបញ្ជាទិញកាន់តែច្រើនពីអតិថិជនជាជនបរទេសផងដែរ។
កសិដ្ឋានចិញ្ចឹមត្រីដែលមានអាយុកាល៧ ឆ្នាំនេះ ត្រូវបានបង្កើតឡើងដោយក្រុមហ៊ុន Rainbow Progress Enterprises Co Ltd មានទីតាំងស្ថិតនៅក្នុងស្រុកពញាឮ ខេត្តកណ្តាល ដែលមានការគាំទ្រផ្នែកហិរញ្ញវត្ថុពីជប៉ុន ហើយក៏ទទួលបានជំនួយបច្ចេកទេសពីទីភ្នាក់ងារសហប្រតិបត្តិការអន្តរជាតិជប៉ុន (JICA) ផងដែរ ដើម្បីផ្តល់ជំនាញនៅក្នុងការផលិតសាច់ត្រីទីឡាព្យ៉ាគុណភាពខ្ពស់ ដែលមានលក្ខណៈពាណិជ្ជកម្ម។
លោក ចាវ សួស្តី ម្ចាស់សិប្បកម្មCambodia Fresh Farm បានអោយដឹងថា បច្ចុប្បន្នកសិដ្ឋានរបស់យើងមានស្រះចិញ្ចឹមត្រីចំនួន ២១ ស្រះ ដោយស្រះនីមួយៗមានទំហំប្រមាណ ៤០ ម x ៤០ ម ហើយស្រះនីមួយៗ គឺយើងចិញ្ចឹមកូនត្រីទីឡាព្យ៉ាប្រមាណ ១ ម៉ឺនក្បាល និងទទួលផលបានប្រមាណ ៣ តោនក្នុងស្រះនីមួយៗ។ លោកពន្យល់ថា «កូនត្រីទីឡាព្យ៉ារបស់យើងគឺជាប្រភេទពូជត្រីក្នុងស្រុក ហើយចិញ្ចឹមរយៈពេល ៦ ខែគឺត្រីរបស់យើងអាចចាប់លក់បាន ដោយក្នុង ១ ក្បាលគឺមានទម្ងន់ចន្លោះពី ៥០០ ទៅ ៦០០ ក្រាម។ យើងមិនទុកឱ្យវាធំជាងនេះទេ ពីព្រោះបើវាធំពេកធ្វើឱ្យសាច់ត្រីមានខ្លាញ់ច្រើនពេក និងមានជាតិទឹកច្រើនពេក ដែលអាចធ្វើឱ្យសាច់ត្រីបាត់បង់រសជាតិ»។
លោកបន្ថែមថា មុនជំងឺកូវីដផ្ទុះឡើងគឺយើងអាចលក់សាច់ត្រីបានប្រមាណ ៥០០ ទៅ ៦០០ គីឡូក្រាមក្នុង ១ ខែ ដោយសារតែមានតម្រូវការខ្ពស់ពីអតិថិជនខ្មែរ និងបរទេស នៅតាមហាង ភោជនីយដ្ឋាន និងផ្សារទំនើបនានា។ លោកថា «យើងធានាថា យើងមានត្រីគ្រប់គ្រាន់ដើម្បីបំពេញតាមតម្រូវការរបស់អតិថិជនជារៀងរាល់ថ្ងៃ។ មុនពេលយកត្រីទៅកែច្នៃយកសាច់ គឺយើងត្រូវចាប់ត្រីចេញពីស្រះ ហើយរក្សាទុកត្រីនៅក្នុងទឹកស្អាតរយៈពេល ៣ ថ្ងៃដើម្បីឱ្យបាត់ធុំក្លិនដី និងបាត់ធុំក្លិនចំណីត្រី ទើបយើងធ្វើការកែច្នៃ»។
បើតាមលោកសួស្តី កសិដ្ឋានចិញ្ចឹមត្រី Cambodia Fresh Farm ចិញ្ចឹមតែត្រីទីឡាព្យ៉ា ១ មុខប៉ុណ្ណោះ ពីព្រោះវាក៏ជាពូជត្រីទឹកសាបដែលពេញនិយមនៅជប៉ុន និងអឺរ៉ុបដែរ ហើយគោលដៅរបស់យើងគឺចិញ្ចឹមត្រីនេះដើម្បីនាំចេញ គឺនាំចេញទៅទីផ្សាអន្តរជាតិ។ លោកថា «ខ្ញុំសង្ឃឹម១០០% ថាឆ្នាំ២០២៤ នេះនឹងអាចនាំចេញទៅក្រៅប្រទេស ព្រោះបច្ចុប្បន្នខ្ញុំយកផលិតផលសាកល្បងទៅប្រទេសជប៉ុន គឺពួកគាត់សប្បាយចិត្ត នឹងរងចាំផលិតផលរបស់កម្ពុជាមួយនេះ»។
លោក Mitsuhiro Kubota ដែលជាប្រធានគ្រប់គ្រងទូទៅនៃកសិដ្ឋានចិញ្ចឹមត្រី Cambodia Fresh Farm បានថ្លែងថា «មូលហេតុដែលយើងជ្រើសរើសយកត្រីទីឡាព្យ៉ា ដោយសារតែមើលឃើញថា ត្រីទីឡាព្យ៉ាមានរសជាតិឆ្ងាញ់ដូចត្រីម្យ៉ាងដែលល្បីនៅក្នុងប្រទេសជប៉ុន ហើយដែលអាចនាំចេញទៅប្រទេសជប៉ុន និងប្រទេសផ្សេងទៀតបាន»។
បច្ចុប្បន្នកសិដ្ឋានចិញ្ចឹមត្រី Cambodia Fresh Farm មានបុគ្គលិក និងកម្មករបម្រើការងារជាង១០ នាក់មានម៉ាស៊ីនបង្កក និងទឹកសម្លាប់មេរោគដែលនាំចូលមកពីប្រទេសជប៉ុន ដូច្នេះទើបធ្វើឱ្យសាច់ត្រីមានគុណភាព និងមានសុវត្ថិភាពខ្ពស់ រហូតដល់អាចបរិភោគឆៅបាន។
សូមបញ្ជាក់ផងដែរថា «កសិដ្ឋានCambodia Fresh Farm ទទួលបានជំនួយគាំទ្រផ្នែកបច្ចេកទេស និងសម្ភារពីគម្រោង CAPFISH-Capture ក្រោមថវិកាគាំទ្រដោយ សហភាពអ៊ឺរ៉ុប។ តាមរយៈកិច្ចគាំទ្រពីគម្រោង CAPFISH សហគ្រាស Cambodia Fresh Farm រំពឹងថានឹងទទួលបានវិញ្ញាបនប័ត្រ HACCP និងពង្រីកចំណែក ទីផ្សារក្នុងស្រុក អាចនាំចេញផលិតផលទៅកាន់ទីផ្សារប្រទេសជប៉ុន និងសហភាពអឺរ៉ុប ក៏ដូចជាទីផ្សារក្រៅស្រុកផ្សេងទៀត៕
