ថ្ងៃនេះ ចិនដឹកសម្ភារៈសម្រាប់ត្រៀមធ្វើសមយុទ្ធរួមគ្នាជាមួយកងទ័ពកម្ពុជា
ភ្នំពេញ៖ ដើម្បីត្រៀមធ្វើសមយុទ្ធសុខាភិបាលយោធាជាមួយកងទ័ពកម្ពុជា ដែលមានឈ្នោះថា «ទេវតាសន្តិភាព-ឆ្នាំ២០២៣»រយៈពេល១៣ថ្ងៃ គឺចាប់ពីថ្ងៃទី១៤ ដល់ថ្ងៃទី២៦ ខែកញ្ញា ឆ្នាំ២០២៣នេះ នៅរាជធានីភ្នំពេញ និងខេត្តសៀមរាប យន្តហោះសុខាភិបាល សិក្ខាកាមជាយោធិន និងសម្ភារពេទ្យជាច្រើនទៀតរបស់កងទ័ពរំដោះប្រជាជនចិន បានដឹកមកដល់ប្រទេសកម្ពុជាហើយ នៅព្រឹកថ្ងៃទី១៤ ខែកញ្ញា ឆ្នាំ២០២៣នេះ។
ថ្លែងប្រាប់ក្រុមអ្នកសារព័ត៌មាន នៅព្រលានយន្តហោះអន្តរជាតិភ្នំពេញ លោកឧត្តមសេនីយ៍ទោ ប៉ែន សុក្រឹត្យវិទ្យា នាយលេខាធិការដ្ឋាន សេនាធិការចម្រុះ នៃកងយោធពលខេមរភូមិន្ទ និងជាប្រធានក្រុមចាត់ចែងទូទៅនៃសមយុទ្ធទេវតាសន្តិភាព-២០២៣ បានបង្ហាញជំនឿជឿជាក់ថា តាមរយៈសមយុទ្ធសុខាភិបាលរួមគ្នា រវាងកងទ័ពកម្ពុជា-ចិន មានឈ្មោះថា «ទេវតាសន្តិភាព-ឆ្នាំ២០២៣» នឹងធ្វើឱ្យកងយោងធពលខេមរភូមិន្ទ កាន់តែមានបទពិសោធន៍ និងសមត្ថភាពបន្ថែមទៀត ដើម្បីបម្រើជាតិមាតុភូមិ ឆ្លើយតបនឹងតម្រូវការជាក់ស្តែង។
លោកឧត្តមសេនីយ៍ទោ ប៉ែន សុក្រឹត្យវិទ្យា បានឱ្យដឹងថា សម្ភារសម្រាប់ចូលរួមធ្វើសមយុទ្ធនេះ គឺដឹកតាមយន្តហោះ ៤គ្រឿង គឺ Y-19 មួយគ្រឿង, Y-20 បីគ្រឿង ក្នុងនោះមានរថយន្តសង្គ្រោះ ៣គ្រឿង រួមនឹងសម្ភារបរិក្ខារសុខាភិបាល សម្ភារសង្គ្រោះចំនួន ១០០០ឈុតជាដើម។ សមយុទ្ធនេះខាងកងទ័ពកម្ពុជា មានកម្លាំងចូលរួមចំនួន ៥៩៥នាក់ ដោយឡែកភាគីចិន មាកងទ័ពចូលចំនួន២៦៩នាក់។
សូមបញ្ជាក់ការធ្វើសមយុទ្ធរួមគ្នារវាងកងទ័ពកម្ពុជា និងចិននេះ គឺដើម្បីអបអរសាទរខួបលើកទី៦៥ឆ្នាំ នៃការបង្កើតចំណងការទូតរវាងកម្ពុជា-ចិន ដើម្បីលើកកម្ពស់សមត្ថភាព,ការផ្លាស់ប្តូរបទពិសោធន៍ក្នុងកិច្ចសហប្រតិបត្តិការផ្នែកសុខាភិបាល, ប្រតិបត្តិការសង្រ្គោះគ្រោះមហន្តរាយ និងជំងឺឆ្លងផ្សេងៗឲ្យប្រកបដោយប្រសិទ្ធភាពជាដើម។
សមយុទ្ធរវាងកងទ័ពកម្ពុជា-ចិនជាលើកដំបូងផ្នែកសុខាភិបាលនេះ ភាគីទាំងពីរបានកំណត់យកប្រធានបទ«ប្រតិបត្តិការសង្គ្រោះសុខាភិបាល មនុស្សធម៌អន្តរជាតិរួមគ្នា នៅតំបន់គ្រោះមហន្តរាយ ខ្យល់ព្យុះ និងទឹកជំនន់ធ្ងន់ធ្ងរ»ជាដើម។
ក្រៅពីធ្វើសមយុទ្ធសុខាភិបាលរួមគ្នាជាមួយកងទ័ពកម្ពុជានោះ កងទ័ពរំដោះប្រជាជនចិនក៏នឹង មានគម្រោងធ្វើកិច្ចការមនុស្សធម៌ដល់បងប្អូនប្រជាពលរដ្ឋខ្មែរផងដែរ ដោយកិច្ចការមនុស្សធម៌នេះនឹងចុះព្យាបាលជំងឺដល់បងប្អូនប្រជាពលរដ្ឋដោយឥតគិតថ្លៃ នៅមន្ទីរពេទ្យព្រះកេតុមាលា រាជធានីភ្នំពេញ និងនៅមន្ទីរពេទ្យយោធភូមិភាគទី៤ ខេត្តសៀមរាប៕
