ប៊ុត សីហា ត្រូវសមត្ថកិច្ចចាប់ខ្លួនជាលើកទី២ ពាក់ព័ន្ធគ្រឿងញៀន
កំពង់ស្ពឺ៖ ម្ចាស់ជ័យលាភីលេខ១ របស់កម្មវិធីប្រឡងចម្រៀង «The Voice Cambodia» រដូវកាលទី១ ប៊ុត សីហា និងបក្ខពួកម្នាក់ទៀត ត្រូវបានកម្លាំងជំនាញផ្នែកប្រឆាំងបទល្មើសគ្រឿងញៀននៃអធិការដ្ឋាននគរបាលស្រុកគងពិសី ឃាត់ខ្លួននៅថ្ងៃទី១២ ខែកញ្ញា ឆ្នាំ២០២៣ នេះ នៅចំណុចភូមិត្រាំខ្នា ឃុំស្នំក្រពើ ស្រុកគងពិសី ខេត្តកំពង់ស្ពឺ ពាក់ព័ន្ធបទល្មើសជួញដូរ និងប្រើប្រាស់គ្រឿងញៀន។
តាមរបាយការណ៍សមត្ថកិច្ចថា កម្លាំងអធិការដ្ឋាននគរបាលស្រុកគងពិសីបានធ្វើការបង្ក្រាប និងមុខសញ្ញាសង្ស័យពាក់ព័ន្ធនឹងគ្រឿងញៀនបានចំនួនពីនាក់ រួមមាន៖ ទី១- ឈ្មោះ ឆន វល្លិន ភេទប្រុស អាយុ ៣៨ឆ្នាំ នៅភូមិត្រាំខ្នា ឃុំស្នំក្រពើ ស្រុកគងពិសី និងទី២- ឈ្មោះ ប៊ុត សីហា ភេទប្រុស អាយុ ២៩ឆ្នាំ នៅភូមិព្រះម្លប់ ឃុំភារីមានជ័យ ស្រុកបសេដ្ឋ ។សមត្ថកិច្ចដកហូតម្សៅក្រាមពណ៌សថ្លាសង្ស័យជាគ្រឿងញៀនចំនួនប្រាំកញ្ចប់ ទូរសព្ទ ចំនូនបីគ្រឿង រួមនឹងឧបករណ៍ប្រើប្រាស់ គ្រឿងញៀនមួយចំនួនទៀត។
នេះមិនមែនជាលើកទី១ទេដែលម្ចាស់ជ័យលាភីលេខ១ ត្រូវសមត្ថកិច្ចឃាត់ខ្លួនកាលពីថ្ងៃទី២១ ខែកុម្ភៈ ឆ្នាំ២០១៨ លោក ប៊ុត សីហា ត្រូវសមត្ថកិច្ចចាប់ឃ្លួនម្តងហើយ ស្ថិតនៅមុខសាលាបឋមសិក្សាពងទឹក សង្កាត់ពងទឹក ខណ្ឌដង្កោ រាជធានីភ្នំពេញ ។ក្រោយហេតុការណ៍នេះលោកត្រូវបានអាណាព្យាបាល និងក្រុមគ្រួសារ មកធានាយកទៅធ្វើការអប់រំ និងដាក់នៅកន្លែងបន្សាបគ្រឿងញៀនរួចហើយ។ បច្ចុប្បន្នសមត្ថកិច្ចជំនាញកំពុងកសាងសំណុំរឿងចាត់ការតាមនីតិវិធី៕
