លោក ជា ច័ន្ទបរិបូរណ៍ ៖ មិនគួរមានការតឹងតែងចំពោះការថតរូបនៅតំបន់ប្រវត្តិសាស្ត្រទេ

ភ្នំពេញ៖ បន្ទាប់ពីកញ្ញា ពេជ្រ ចរណៃ អ្នកស្រឡាញ់ និងអភិរក្សល្បុក្កតោខ្មែរមួយរូប បានសរសេរនៅលើហ្វេសប៊ុករបស់ខ្លួនពីភាពលំបាកក្នុងការសុំអនុញ្ញាតពីអាជ្ញាធរ សម្រាប់ថតរូបបង្ហាញពីក្បាច់គុនខ្មែរ ជាមួយប្រាសាទអង្គរវត្ តដើម្បីផ្សព្វផ្សាយវប្បធម៌ខ្មែរទៅកាន់ពិភពលោកឱ្យបានស្គាល់ មន្ត្រីជាន់ខ្ពស់ក្រសួងព័ត៌មាន លើកឡើងថា មិនគួរមានការតឹងតែងក្នុងការថតរបស់មហាជននៅតាមតំបន់ទេសចរណ៍ប្រវត្តិសាស្ត្រ ឬតំបន់ធម្មជាតិឡើយ។

សរសេរនៅលើទំព័រហ្វេសប៊ុករបស់លោក នៅថ្ងៃទី០៥ ខែកញ្ញា ឆ្នាំ២០២៣នេះ រដ្ឋលេខាធិការក្រសួងព័ត៌មាន លោក ជា ច័ន្ទបរិបូរណ៍ បានអោយដឹងថា “ខ្ញុំយល់ថា មិនគួរតឹងតែងក្នុងការថតតាមតំបន់ទេសចរណ៍ប្រវត្តិសាស្ត្រ ឬធម្មជាតិឡើយ ហើយត្រូវធ្វើការលើកទឹកចិត្ត ដោយផ្តល់ជារង្វាន់ដល់អ្នកផលិតមាតិការទេសចរណ៍ណា ដែលទទួលបានការមើលច្រើនថែមទៀតផង”។ លោកជឿថា ការផ្សព្វផ្សាយពីតំបន់ទេសចរណ៍ប្រវត្តិសាស្រ្តតាមរយៈមហាជននេះ គឺធ្វើឱ្យពិភពលោកស្គាល់កម្ពុជា បានច្រើនជាងការជួលឱ្យប្រព័ន្ធផ្សព្វផ្សាយធំៗផ្សព្វផ្សាយថែមទៀត ហើយក៏មិនអស់ប្រាក់នោះដែរ៕