រដ្ឋមន្ត្រីក្រសួងបរិស្ថាន ប្រកាសដាក់ចេញយុទ្ធនាការកាត់បន្ថយការប្រើប្រាស់ថង់ប្លាស្ទិក នៅតាមសាលារៀន
ភ្នំពេញ៖ ចាប់ផ្តើមពីថ្ងៃទី០១ ខែកញ្ញា ឆ្នាំ២០២៣តទៅ រដ្ឋមន្ត្រីក្រសួងបរិស្ថាន បានប្រកាសដាក់ចេញយុទ្ធនាការកាត់បន្ថយការប្រើប្រាស់ថង់ប្លាស្ទិក ជាមួយសិស្សានុសិស្សនៅតាមសាលារៀន។ យុទ្ធនាការនេះ ផ្តើមដំបូងនៅតាមសាលារៀនទាំង៤៤ កន្លែងនៅទូទាំងស្រុកអូររាំងឪ ខេត្តត្បូងឃ្មុំ។
ការអប់រំឱ្យប្រជាពលរដ្ឋយល់ពីផលលំបាក ពីឥទ្ធិពលអាក្រក់នៃប្លាស្ទិកសម្រាប់បរិស្ថាន និងជីវិត គឺជាកិច្ចការដ៏សំខាន់មួយ ដើម្បីឆ្ពោះទៅសម្រេចនូវផែនការកាត់បន្ថយការប្រើប្រាស់ប្លាស្ទិក។ លោក អ៊ាង សុផល្លែត ចាប់យកយុទ្ធនាការកាត់បន្ថយប្លាស្ទិកជាមួយសិស្សានុសិស្សនៅតាមសាលារៀន។ លោករដ្ឋមន្ត្រីក្រសួងបរិស្ថាន បានសំណូមពរសិស្សានុសិស្សទាំងអស់គ្នា ចូលរួមៗក្នុងយុទ្ធនាការកាត់បន្ថយការប្រើប្រាស់ថង់ប្លាស្ទិកទាំងអស់គ្នា «ដើម្បីភាពល្អបរិសុទ្ធបរិស្ថានយើង»។
ជាមួយគ្នានេះ ឯកឧត្តម អ៊ាង សុផល្លែត ក៏បានថ្លែងអំណរគុណលោកគ្រូអ្នកគ្រូ គណៈគ្រប់គ្រងសាលា ជាពិសេសសិស្សនានុសិស្ស នៅអនុវិទ្យាល័យ ហ៊ុន សែន ទួលសុភី ឃុំទួលសុភី ស្រុកអូររាំងឪ ខេត្តត្បូងឃ្មុំ បានប្រកាសប្តេជ្ញាចិត្តចូលរួម ក្នុងយុទ្ធនាការនេះ និង បានសន្យាមិនប្រើថង់ប្លាស្ទិកជាដាច់ខាត។
ថង់ប្លាស្ទិកជាបញ្ហាដ៏គួរឱ្យព្រួយបារម្ភ ដែលកំពុងរីករាលដាលនៅលើសកលលោក។ ជារៀងរាល់ឆ្នាំសំណល់ប្លាស្ទិកចំនួន ៣០០លានតោន ត្រូវបានបង្កើត ហើយត្រូវការរយៈពេល ១ពាន់ឆ្នាំ ដើម្បីរលាយ។ បញ្ហានេះ ក៏កំពុងកើតឡើងនៅកម្ពុជាផងដែរ។ កំណើនប្រជាជន និងការលូតលាស់សេដ្ឋកិច្ចយ៉ាងឆាប់រហ័សបាននាំឱ្យបរិមាណសំណល់មានការកើនឡើងយ៉ាងខ្លាំង។ នៅរាជធានីភ្នំពេញ សំណល់ជាំង ៣,៥០០តោន ត្រូវបានបង្កើតឡើងជារៀងរាល់ថ្ងៃ ដែលក្នុងនោះ ២០ភាគរយជាប្លាស្ទិក។
សូមបញ្ចាក់ថា ការគ្រប់គ្រងសំណល់រឹង សំរាមគឺជាកាតព្វកិច្ចរបស់យើងទាំងអស់គ្នា។ ដើម្បីចូលរួមការពារ ពង្រឹង ការគ្រប់គ្រងបរិស្ថាន ក្រសួងបរិស្ថានបានបង្កើតច្បាប់ បទដ្ឋានគតិយុត្ដជាច្រើនក្នុងនោះមានច្បាប់ធំៗ ក្នុងនោះក្រមបរិស្ថានដែលមានវិសាលភាពគ្របដណ្ដប់លើការងារពាក់ព័ន្ធវិស័យបរិស្ថាន និងធនធានធម្មជាតិដោយការធ្វើសមាហរណកម្មច្បាប់ និងលិខិតបទដ្ឋានគតិយុត្ដពាក់ព័ន្ធដែលមានស្រាប់៕
