នាយករដ្ឋមន្ត្រី បានណែនាំឲ្យរៀបចំមន្ត្រីបច្ចេកទេសកសិកម្មឃុំចាប់ពីឆ្នាំ ២០២៣នេះតែម្ដង
ភ្នំពេញ៖ នៅក្នុងពិធីសំណេះសំណាលជាមួយកម្មករនិយោជិតសរុបជិត ២ម៉ឺននាក់ ក្នុងក្រុងតាខ្មៅ ខេត្តកណ្តាល នៅថ្ងៃទី១ ខែកញ្ញានេះ ឯកឧត្តមបណ្ឌិត ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានណែនាំឲ្យរៀបចំមន្ត្រីបច្ចេកទេសកសិកម្មឃុំចាប់ពីឆ្នាំ ២០២៣នេះតែម្ដង ដោយមិនចាំបាច់ដល់ឆ្នាំ ២០២៤នោះឡើយ។
នាយករដ្ឋមន្ត្រីកម្ពុជា បានថ្លែងថា «ហើយការដាក់ពង្រាយមន្ត្រីបច្ចេកទេសកសិកម្មនោះ ខ្ញុំមិននិយាយទៀតទេ គឺយើងរៀបចំហើយ យើងអាចចាប់ផ្ដើមមួយចំនួននៅក្នុងឆ្នាំនេះតែម្ដង ដោយមិនបាច់ឆ្នាំក្រោយទេ ២៥០នាក់ ព្រោះកន្លងទៅយើងមានចចារក្នុងគោលនយោបាយ ដាក់ ២០២៤ ហើយ ២០២៥ បានដាក់អនុវត្ត បានខ្ញុំជម្រាបទៅឯកឧត្ដមអគ្គបណ្ឌិតសភាចារ្យ ហើយជជែកជាមួយឯកឧត្ដម ឌិត ទីណា ថា កុំចាំប្រជាពលរដ្ឋយើងត្រូវការបន្ទាន់ រៀបចំទៅ អញ្ចឹងយើងអាចចាត់ចែង ចាប់ផ្ដើមពីឆ្នាំ ២០២៣នេះទៅ ដើម្បីអនុវត្តតែម្ដង»៕
