ផ្ទុះអាវុធ៤គ្រាប់នៅក្នុងខណ្ឌបឹងកេងកងបណ្ដាលឱ្យជនបរទេសម្នាក់ស្លា.ប់ភ្លាមៗនៅនឹងកន្លែង

នៅវេលាម៉ោងប្រហែល១២ថ្ងៃត្រង់ ថ្ងៃទី២៩ ខែកក្កដា ឆ្នាំ២០២៣នេះ មានហេតុការណ៍ហិង្សាផ្ទុះអាវុធមួយករណីដែលកើតឡើង នៅម្ដុំផ្លូវ៣៦០ ស្ថិតក្នុងសង្កាត់ទួលស្វាយព្រៃទី១ ខណ្ឌបឹងកេងកង​ រាជធានីភ្នំពេញ ដែលបានបណ្ដាលឱ្យជនរងគ្រោះដែលជាជនបរទេសម្នាក់ ស្លាប់បាត់បង់ជីវិតនៅនឹងកន្លែងកើតហេតុ។ ហេតុការណ៍នេះបានបង្កជាការភ្ញាក់ផ្អើលយ៉ាងខ្លាំងដល់ប្រជាពលរដ្ឋដែលឆ្លងកាត់ និងរស់នៅជិតទីតាំងកើតហេតុ។

ប្រភពពីប្រជាពលរដ្ឋនៅកន្លែងកើតហេតុបានឱ្យដឹងថា ជនរងគ្រោះត្រូវបានខ្មាន់កាំភ្លើងជិះរថយន្ដម៉ាកឡិចស៊ីសចុះរត់ដេញបាញ់ប្រហារលើជនរងគ្រោះ រួចហើយក៏ជិះឡើងរថតយន្តគេចខ្លួនបាត់តែម្ដង។

យ៉ាងណា ចំពោះមូលហេតុដែលឈានដល់ការផ្ទុះអាវុធបាញ់ប្រហាររហូតដល់៤គ្រាប់នេះ​ នៅមិនទាន់ដឹងនៅឡើយ ខណៈបច្ចុប្បន្នកម្លាំងសមត្ថកិច្ចជំនាញកំពុងធ្វើការពិនិត្យ និងស្រាវជ្រាវនៅកន្លែងកើតហេតុ ដើម្បីស្វែងរកខ្មាន់កាំភ្លើង និងមូលហេតុ៕