Neymarត្រូវអាជ្ញាធរប្រេស៊ីលផាកពិន័យ៣,៣លានដុល្លារពីបទជីកផ្លូវទឹក
(ប្រេស៊ីល)៖ អាជ្ញាធរប្រេស៊ីលបានឱ្យដឹងកាលពីថ្ងៃចន្ទ ទី ៣ ខែកក្កដាថា រដ្ឋអាជ្ញារបស់ប្រទេសបានផាកពិន័យកីឡាករបាល់ទាត់ដ៏ល្បីឈ្មោះ លោក Neymar នូវទឹកប្រាក់ចំនួន ៣,៣ លានដុល្លារ ចំពោះការជីកបឹងមួយនៅក្នុងបរិវេណភូមិគ្រឹះដ៏ស្ដុកស្ដម្ភរបស់លោកនៅជាយក្រុងរីយ៉ូ ដឺហ្សានេរ៉ូ ដោយគ្មានអាជ្ញាប័ណ្ណផ្នែកបរិស្ថាន។ នេះបើតាមទីភ្នាក់ងារសារព័ត៌មាន AFP។
លេខាធិការដ្ឋានក្រុមប្រឹក្សាប្រេស៊ីលបាននិយាយនៅក្នុងសេចក្តីថ្លែងការណ៍ថា ក្រុមប្រឹក្សាក្រុង Mangaratib នៃក្រុងរីយ៉ូ ដឺហ្សានេរ៉ូ បានចេញការផាកពិន័យចំនួន ៤ ចំពោះ «ការបំពានបរិស្ថានក្នុងការជីកបឹងសិប្បនិម្មិតមួយ នៅឯភូមិគ្រឹះដ៏ស្ដុកស្ដម្ភរបស់ Neymar»។
ការបំពានទាំង ៤ នោះស្ថិតនៅក្នុងចំណោមការបំពានរាប់សិប ដែលត្រូវបានរកឃើញដែលរួមមានការអនុវត្តការងារក្រោមការគ្រប់គ្រងបរិស្ថានដោយគ្មានការអនុញ្ញាត ការទប់ និងការបង្វែរទឹកទន្លេដោយគ្មានការអនុញ្ញាត និងការជីកយកដីដោយគ្មានការអនុញ្ញាតជាដើម។
ចំពោះការចេញបញ្ជាផាកពិន័យនេះ លោក Neymar មានរយៈពេល ២០ ថ្ងៃ ដើម្បីប្តឹងជំទាស់ ខណៈការពិន័យដំបូងឡើងកំណត់ត្រឹមជិត ១ លានដុល្លារប៉ុណ្ណោះ។
ការចេញការពិន័យនេះ ធ្វើឡើងបន្ទាប់ពីអាជ្ញាធរប្រេស៊ីលរកឃើញការរំលោភបរិស្ថានជាច្រើននៅទីអចលនទ្រព្យប្រណីតរបស់លោក Neymar ដែលមានកម្មករសំណង់កំពុងជីកបឹងនិងបង្កើតឆ្នេរសិប្បនិម្មិត ក្រោយពីមានការរិះគន់នៅលើបណ្ដាញសង្គមចំពោះបញ្ហានេះ។
ក្រោយមក អាជ្ញាធរប្រេស៊ីលបានបិទទីតាំង និងបញ្ជាឱ្យបញ្ឈប់រាល់សកម្មភាពទាំងអស់ ប៉ុន្តែប្រព័ន្ធផ្សព្វផ្សាយបានផ្សាយថា លោក Neymar បានរៀបចំពិធីជប់លៀង និងនាំគ្នាចុះងូតទឹកបឹងនៅទីនោះយ៉ាងគឃ្លើន៕
