ភ្លៀងធ្លាក់ខ្លាំងវាយប្រហារភាគខាងត្បូងប្រទេសជប៉ុនខណៈកម្ដៅខ្លាំងបានវាយប្រហារភាគខាងលិចនិងខាងជើងប្រទេស
(ប្រទេសជប៉ុន)៖ មន្ត្រីឧត្តុនិយមរបស់ប្រទេសជប៉ុន កំពុងអំពាវនាវឱ្យប្រជាជនរស់នៅតំបន់ Kyushu ស្ថិតនៅភាគខាងត្បូងប្រទេសជប៉ុន បង្កើនការប្រុងប្រយ័ត្ន ចំពោះការរអិលបាក់ដី និងទឹកជំនន់ ដោយសារតែភ្លៀងធ្លាក់ខ្លាំង ដែលបានវាយលុកតំបន់នេះកាលពីចុងសប្តាហ៍ហើយអាចនឹងអូសបន្លាយថែមទៀត។
សារព័ត៌មានជប៉ុន NHK បានរាយការណ៍នាថ្ងៃទី៣ ខែកក្កដានេះ ថាស្ថានភាពអាកាសធាតុបែបនេះ នឹងនៅតែរក្សានៅតំបន់ Kyushu ដោយនាំមកនូវភ្លៀងធ្លាក់យ៉ាងគំហុក។
មន្ត្រីឧតុនិយមបានឱ្យដឹងទៀតថា តាមការប៉ាន់ស្មាន ស្ថានភាពអាកាសធាតុនេះនឹងនៅតែគ្របដណ្ដប់លើកោះ Kyushu បន្តទៀត ហើយអាចនឹងនាំឱ្យមានភ្លៀងធ្លាក់លើសពី ៥០ មិល្លីម៉ែត្រ ក្នុងមួយម៉ោង។
យោងតាមសារព័ត៌មាន NHK ដដែលបានបន្តថា នៅព្រឹកថ្ងៃចន្ទ ខេត្ត Oita អាចមានភ្លៀងធ្លាក់រហូតដល់ ៦៥ មិល្លីម៉ែត្រ ក្នុងរយៈពេលតែមួយម៉ោង។
សេចក្ដីជូនដំណឹងត្រូវបានចេញផ្សាយដើម្បីដាស់តឿនប្រជាជនឱ្យមានការប្រុងប្រយ័ត្នទៅលើការរអិលបាក់ដី ការជន់លិចនៅតំបន់ទំនាប ទឹកជន់លេចទន្លេ រន្ទះ និងខ្យល់កន្រ្តាក់ផងដែរ។
យោងតាមរបាយការណ៍ដដែលនេះផងដែរ ដោយសារភ្លៀងធ្លាក់ខ្លាំងនាពេលថ្មីៗនេះ បានធ្វើឱ្យផែនដីកាន់តែអស្ថិរភាព ដែលបង្កើនលទ្ធភាពនៃការរអិលបាក់ដី និងគ្រោះមហន្តរាយធម្មជាតិផ្សេងទៀតនៅក្នុងតំបន់ដែលរងផលប៉ះពាល់។
ប្រជាជនម្នាក់ស្លាប់ និងពីរនាក់ទៀតបាត់ខ្លួន៖
យោងតាមសារព័ត៌មានក្យូដូ បានឱ្យដឹងថា មនុស្សម្នាក់បានស្លាប់ និងពីរនាក់ផ្សេងទៀតបានបាត់ខ្លួនកាលពីថ្ងៃសៅរ៍ ដែលជាលទ្ធផលនៃទឹកភ្លៀងដែលបានបំបែកកំណត់ត្រារៀងរាល់ម៉ោង ដែលត្រូវបានរាយការណ៍នៅក្នុងតំបន់ជាច្រើននៃភាគខាងលិចទីក្រុង Honshu និងតំបន់ Kyushu ។
យោងតាមអាជ្ញាធរមូលដ្ឋានដែលដកស្រង់ដោយសារព័ត៌មានក្យូដូ គ្រោះរអិលបាក់ដីនៅខេត្ត Oita បានលេបត្របាក់ផ្ទះមួយខ្នង ដោយក្រុមអ្នកជួយសង្គ្រោះនៅតែព្យាយាមស្វែងរកបុរសអាយុ ៧០ ឆ្នាំដែលជាម្ចាស់កាន់កាប់ ហើយគេក៏បានរកឃើញសាកសពបុរសម្នាក់នៅក្នុងរថយន្តដែលត្រូវបានប៉ះទង្គិចនៅក្នុងខេត្ត Yamaguchi នេះផងដែរ។
យោងតាមអាជ្ញាធរក្នុងតំបន់បានឱ្យដឹងថា រថយន្តចំនួន ៧ គ្រឿងត្រូវបានរកឃើញជាប់គាំងនៅក្នុងទីក្រុង Mine ខេត្ត Yamaguchi ដោយសារតែភ្លៀងធ្លាក់ខ្លាំង ហើយអ្នកបើកបរម្នាក់បានបាត់ខ្លួន។
បញ្ហាកើនកម្ដៅខ្លាំងនៅភាគខាងលិច ខាងជើងប្រទេសជប៉ុន៖
សារព័ត៌មានជាតិរបស់ជប៉ុន NHK បានរាយការណ៍ថា សីតុណ្ហភាពបានកើនឡើង នៅកន្លែងជាច្រើនរាប់ពីភាគខាងលិចរហូតដល់ភាគខាងជើង ប្រទេសជប៉ុន កាលពីថ្ងៃអាទិត្យ ហើយកម្ដៅដ៏ក្តៅគគុកនេះ ត្រូវបានគេរំពឹងថានឹងបន្តទៀតដល់ថ្ងៃចន្ទ គ្របដណ្ដប់លើតំបន់ Kinki និងTokai។
គេប៉ាន់ស្មានទៀតថា នៅថ្ងៃចន្ទសីតុណ្ហភាពនឹងកើនឡើងដល់ ៣៥ អង្សារសេនៅក្នុងទីក្រុង Nara, Gifu, Nagoya និង Kofu និងកើនត្រឹម ៣២ អង្សារសេ នៅកណ្តាលទីក្រុងតូក្យូ។
យោងតាម NHK ដដែលនេះ នៅតំបន់មួយចំនួន សីតុណ្ហភាពខ្ពស់នៅពេលថ្ងៃ នៅថ្ងៃអាទិត្យបានឡើងដល់ ៣៥.៣ អង្សារសេ នៅទីក្រុងតូយ៉ូតា ក្នុងខេត្ត Aichi ៣៥.១ អង្សារសេនៅទីក្រុង Shimanto ក្នុងខេត្ត Kochi និង ៣១.៧ អង្សារសេ នៅកណ្តាលទីក្រុងតូក្យូ។
ទូរទស្សន៍ជាតិខាងលើនេះបានរំឭកទៀតថា សីតុណ្ហភាពខ្ពស់ក៏អាចបណ្តាលឱ្យមានបរិយាកាសមិនស្ថិតស្ថេរ ហើយមន្ត្រីជំនាញកំពុងជំរុញឱ្យប្រជាជនបង្កើនការប្រុងប្រយ័ត្នចំពោះភ្លៀងធ្លាក់ រន្ទះ និងខ្យល់កន្ត្រាក់ផងដែរ៕
