ក្លិបប្រដាល់គុនខ្មែរនៅទីក្រុងឡុងប៊ិច នឹងត្រូវផ្លាស់ប្តូរទៅកាន់ទីតាំងថ្មី បន្ទាប់ពីបានបើកដំណើការអស់៣៦ឆ្នាំ
(កីឡា)៖ ក្លិបប្រដាល់គុនខ្មែរនៅទីកក្រុងឡុងប៊ិច សហរដ្ឋអាមេរិកឈ្មោះ «មជ្ឈមណ្ឌលខ្មែរឃីកបុកស៊ីងឡុងប៊ិច»នឹងត្រូវផ្លាស់ប្តូរទៅកាន់ទីតាំងថ្មី បន្ទាប់ពីបានបើកដំណើការអស់រយៈពេល៣៦ឆ្នាំ។ នេះបើយោងតាមការផ្សាយរបស់សារព័ត៌មាន Long Beach Post។
ក្លិបប្រដាល់គុនខ្មែរនេះស្ថិតនៅ Anaheim Street ដែលមានអង្គការ Long Beach Rescue Mission ជាម្ចាស់។ អង្គការត្រូវការ ទីកន្លែងដើម្បីធ្វើជាទីជម្រកសម្រាប់អ្នកគ្មានផ្ទះសម្បែង។ ក្លិបនេះត្រូវបានបង្កើតឡើងកាលពីឆ្នាំ១៩៨៧ ដោយលោក អ៊ុំ រី ដែលជាជើងឯកគុនខ្មែរម្នាក់។ កាលអាយុ២៣ឆ្នាំ លោកបានក្លាយជាជើងឯកជាតិនៅប្រទេសកម្ពុជា និងរយៈពេល១៥ឆ្នាំលោកបានចេញប្រកួតទូទាំងតំបន់អាស៊ានដែលមានស្ថិតិប្រកួតឈ្នះជាង២៥០ដង។ នៅឆ្នាំ១៩៧២ លោកបានឈ្នះជើងឯកអន្តរជាតិ និងមានជីវិតពីសម័យខ្មែរក្រហមឆ្នាំ១៩៧៥។
បន្ទាប់មក លោក រី បានទៅដល់សហរដ្ឋអាមេរិក និងបានរស់នៅទីក្រុងឡុងប៊ិច ដោយបានបើកក្លិបប្រដាល់គុនខ្មែរមួយនេះដែលបានក្លាយជាសាលាបង្ហាត់ប្រដាល់ឃីកបុកស៊ីងមានអាយុកាលចាស់ជាងគេបំផុតរបស់ជនជាតិអាស៊ាននៅរដ្ឋកាលីហ្វ័រញ៉ាខាងត្បូង។
លោក រ៉ុន ស្មីត ស្ថាបក្លិបប្រដាល់ខ្មែរមួយនេះបាននិយាយថា ការផ្លាស់ប្តូរទៅទីតាំងថ្មីប្រហែលជាថ្ងៃទី១ ខែសីហាខាងមុខ។ លោកបានហ្វឹកហាត់ប្រដាល់គុនខ្មែរតាមរយៈលោកគ្រូ អ៊ុំ រី ដូច្នេះលោកចង់ឲ្យមរតកគុនខ្មែរបន្តគង់វង់យូរអង្វែង។ រយៈពេលជាច្រើនឆ្នាំកន្លងទៅនេះ «មជ្ឈមណ្ឌមខ្មែរឃីកបុកស៊ីងឡុងប៊ិច»បានបណ្តុះបណ្តាលកីឡាករ កីឡាការិនីប្រដាល់គុនខ្មែរ និងឃីកបុកស៊ីងជាច្រើនដែលបានចេញប្រកួតទូទាំងពិភពលោក៕
