បិសាចក្រហមMan UtdទិញយកកីឡាករMason MountពីChelseaក្នុងតម្លៃ៦០លានផោន

ក្លិបបាល់ទាត់បិសាចក្រហម Manchester United បានព្រមព្រៀងសម្រេចចុះកុងត្រាយក កីឡាករ Mason Mount ពីក្លឹបតោខៀវ Chelsea។ ការផ្ទេររបស់កីឡាករ Mason Mount ទៅកាន់ក្លឹប Manchester United គឺដោយការចុះកុងត្រារយៈពេល ៥ឆ្នាំ នៅក្នុងតម្លៃខ្លួន ៥៥លានផោន បូកថែមពីលើ ៥លានផោនទៀត។ គ្រូបង្វឹកបិសាចក្រហម លោក Erik ten Hag ចង់ពង្រឹងទម្រង់លេងរបស់ក្រុមខ្លួនដើម្បីត្រៀមការប្រកួតពាន Champions League។

មែនទែនទៅក្លិបតោខៀវ Chelsea មិនចង់បាត់បង់កីឡាករ Mason Mount ទេ ប៉ុន្តែដោយសារតែការចរចាររវាងកីឡាករនិងក្លិបមិនត្រូវគ្នា ដើម្បីឈានទៅបន្តកុងត្រាថ្មី ស្របពេលដែលកុងត្រាចាស់នឹងផុតនៅឆ្នាំក្រោយ។

សូមបញ្ជាក់ថា Mason Mount ស៊ុតបញ្ចូលទីបាន ៣៣គ្រាប់ ក្នុងការបង្ហាញខ្លួនចំនួន ១៩៥ប្រកួតឱ្យក្លឹប Chelsea ចាប់តាំងពីបានឡើងមកលេងឱ្យឈុតធំនៅក្នុងឆ្នាំ ២០១៩។ កីឡាករវ័យ ២៤ឆ្នាំរូបនេះបានខកខានចូលលេងឱ្យតោខៀវ នៅរដូវកាលចុងក្រោយនេះដោយសារតែរូបគេមានរបួស។ Chelsea បានបញ្ចប់រដូវកាលពានលីកកំពូលអង់គ្លេស Premier League ដោយឈរនៅចំណាត់ថ្នាក់លេខ ១២ក្នុងតារាង៕