ចាប់ខ្លួនមនុស្ស៤នាក់និងរឹបអូសសារធាតុញៀនជិត៨០គីឡូក្រាមនៅស្រុកត្រាំកក់ ខេត្តតាកែវ
(ខេត្តតាកែវ)៖ សមត្ថកិច្ចនៃមន្ទីរប្រឆាំងបទល្មើសគ្រឿងញៀន (ក៤) ក្រោមកិច្ចសហការជាមួយនឹងកម្លាំងនៃស្នងការដ្ឋាននគរបាលខេត្តតាកែវ និងស្នងការនគរបាលរាជធានីភ្នំពេញ ដោយដឹកនាំសម្របសម្រួលដោយលោកឯក ឆេងហួត ព្រះរាជអាជ្ញាខេត្តតាកែវបានចុះស្រាវជ្រាវ និងឈានទៅបង្ក្រាប ករណីជួញដូរដោយខុសច្បាប់នូវសារធាតុញៀននៅចំណុចភូមិតាសូ ឃុំឧត្តមសូរិយា ស្រុកត្រាំកក់ ដោយបានចាប់ខ្លួនមនុស្សចំនួន ៤ នាក់ និងរឹបអូសថ្នាំញៀន ព្រមទាំងសារធាតុគីមីផ្សំជិត ៨០ គីឡូក្រាម។ នេះបើយោងតាមនគរបាលជាតិនាថ្ងៃទី១២ ខែឧសភានេះ។
ជនសង្ស័យជាបុរសជនជាតិខ្មែរទាំង ៤ នាក់នោះរួមមាន ទី១.ឈ្មោះ ទួន សាស្រា្ត អាយុ ២៩ ឆ្នាំ ទី២.ឈ្មោះ ហ្វាង យ៉ាងណាម អាយុ ៤៤ ឆ្នាំ ទី៣.ឈ្មោះ ចាន់ វាសនា អាយុ ៣៧ ឆ្នាំ និងទី៤.ឈ្មោះ ផាន វណ្ណារ៉ា អាយុ ៤៤ ឆ្នាំ។
វត្ថុតាងដែលត្រូវបានរកឃើញនិងរឹបអូសរួមមាន ៖ គ្រឿងញៀនប្រភេទមេតំហ្វេតាមីនទម្ងន់ ១១៨.៦៤ ក្រាម សារធាតុគីមីផ្សំ (មិនច្បាស់)ទម្ងន់ ៧៩ គីឡូ ១៧៦ ក្រាម និងរថយន្ត ១ គ្រឿង។ បច្ចុប្បន្នជនសង្ស័យ និងវត្ថុតាងត្រូវបានកសាងសំណុំរឿងបញ្ជូនទៅសាលាដំបូងខេត្តតាកែវចាត់ការតាមនីតិវិធី។
ការបង្រ្កាបនេះគឺអនុវត្តតាមបញ្ជាលោក នេត សាវឿន អគ្គស្នងការនគរបាលជាតិ និងលោក ម៉ក់ ជីតូ អគ្គស្នងការរងទទួលផែនការប្រឆាំងបទល្មើសគ្រឿងញៀន ក្រោមការបញ្ជាដឹកនាំផ្ទាល់របស់លោក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន។ នេះបើយោងតាមប្រភពដដែលនេះ៕
