ឃាត់ខ្លួនមុខសញ្ញាគប់កញ្ចក់រថយន្ដដ៏សកម្មម្នាក់នៅស្រុកសំរោងទង

(ខេត្តកំពង់ស្ពឺ)៖កាលពីវេលាម៉ោង ១៩:៣៥នាទីយប់ថ្ងៃទី២ ខែឧសភា ឆ្នាំ២០២៣  នៅតាមផ្លូវក្នុងភូមិកំពង់ល្វា ឃុំទំព័រមាស ស្រុកសំរោងទង ខេត្តកំពង់ស្ពឺ មានជនសង្ស័យបានធ្វើសកម្មភាពយកដុំ ថ្មគប់កញ្ចក់រថយន្តអ្នកដំណើរ រថយន្ដដឹកកម្មករ-កម្មការិនី ដែលធ្វើដំណើរឆ្លងកាត់តាមភូមិសាស្រ្ដខាងលើ បណ្តាលអោយបែកកញ្ចក់ផ្នែកខាងមុខ ។

រថយន្ដបែកកញ្ចក់ជាកម្មសិទ្ធរបស់ឈ្មោះ ជា សិទ្ធ ភេទប្រុស អាយុ២១ឆ្នាំ នៅភូមិកំពង់ល្វា ឃុំទំព័រមាស ស្រុកសំរោងទង ខេត្តកំពង់ស្ពឺ មុខរបបើករថយន្តដឹកកម្មករ ម៉ាកហ៊ីយិនដាយ កូរ៉េពណ៌ស ពាក់ស្លាកលេខ កំពង់ស្ពឺ 2A-8710 ។

ដោយបានការយកចិត្ដទុកដាក់ និងចង្អុលការណែនាំដ៏ខ្ពង់ខ្ពស់ពី លោកឧត្ដមសេនីយ៍ទោ សម សាមួន ស្នងការនគរបាលខេត្ដ នាព្រឹកថៃ្ង០២ ខែឧសភា ឆ្នាំ២០២៣ លោកវរសេនីយ៍ឯក ឃុត សុផល អធិការ នគរបាលស្រុកសំរោងទង បានស្រាវជ្រាវនិងឃាត់ជនសង្ស័យម្នាក់មានឈ្មោះ ហ៊ុន ហាន ហៅឡុញ ភេទប្រុស អាយុ២១ឆ្នាំ រស់នៅភូមិទឹកស្អុយ ឃុំទំព័រមាស ស្រុកសំរោងទង ខេត្តកំពង់ស្ពឺ ។

បច្ចុប្បន្នសមត្ថកិច្ចបាននាំជនសង្ស័យ មកអធិការដ្ឋាននគរបាលស្រុកសំរោងទង ដើម្បីសាកសួរនិងចំណាត់ការតាមនីតិវិធីបន្ដ៕