តិចអត់ដឹង!CAMSOCហាមមិនឱ្យថតនិងចែកចាយរូបភាពសម្តែងសាកល្បងក្នុងពិធីបើក-បិទស៊ីហ្គេមដាច់ខាត

គណៈកម្មាធិការរៀបចំព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣(CAMSOC) បានជូនដំណឹងដល់សាធារណៈជូន និងក្រុមការងាររៀបចំសម្តែងពិធីបើក-បិទ ឱ្យបានដឹងថា គណៈកម្មាធិការរៀបចំព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេម ហាមដាច់ខាតការថតរូប និងចែកចាយរូបភាពក្នុងពេលហ្វឹកហាត់សម្តែង និងសម្តែងសាកល្បង ពិធីបើក-បិទ ព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ នៅក្នុងពហុកីឡាដ្ឋានជាតិមរតកតេជោ។ មិនតែប៉ុណ្ណោះ CAMSOCបញ្ជាក់ទៀតថា ក្រៅពីអ្នកហ្វឹកហាត់សម្តែង និងក្រុមជំនួយការហ្វឹកហាត់សម្តែង គឺមិនអនុញ្ញាតឱ្យចូលក្នុងពហុកីឡាដ្ឋានមរតកតេជោឡើយ។

យ៉ាងណា គណៈកម្មាធិការរៀបចំព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ក៏បានស្នើសុំការអធ្យាស្រ័យពីសំណាក់សាធារណៈជនទាំងអស់ផងដែរ៕