ភោជនីយដ្ឋាន១០កន្លែងទៀតក្នុងខេត្តពោធិ៍សាត់ប្រកាសមិនលក់ម្ហូបធ្វើពីសាច់សត្វព្រៃ សរុប១៩កន្លែង
(ខេត្តពោធិ៍សាត់)៖ ម្ចាស់ភោជនីយដ្ឋាន និងអាហារដ្ឋានចំនួន១០កន្លែងទៀត ក្នុងស្រុកវាលវែង ខេត្តពោធិ៍សាត់ បានប្រកាសប្ដេជ្ញាមិនលក់មុខម្ហូបធ្វើពីសាច់សត្វព្រៃជូនដល់ភ្ញៀវឡើយ ដើម្បីចូលរួមការពារ និងអភិរក្សសត្វព្រៃ នាំឱ្យចំនួនភោជនីយដ្ឋាន និងអាហារដ្ឋានដែលប្រកាសមិនម្ហូបធ្វើពីសាច់សត្វព្រៃនៅក្នុងខេត្តពោធិ៍សាត់សរុបកើនដល់១៩កន្លែងហើយ។ នេះបើយោងតាមការបញ្ជាក់របស់លោក នេត្រ ភក្រ្តា អ្នកនាំពាក្យក្រសួងបរិស្ថាន ក្នុងពិធីបើកយុទ្ធនាការអន្ទាក់សូន្យ ដំណាក់កាលទី២ លើកទី២ នៅក្នុងស្រុកវាលវែង ខេត្តពោធិ៍សាត់ នាថ្ងៃទី២២ ខែមេសា ឆ្នាំ២០២៣។
សូមបញ្ជាក់ថា យុទ្ធនាការអន្ទាក់សូន្យ ដំណាក់កាលទី២ លើកទី២ ដែលបានរៀបចំធ្វើនៅទីរួមខេត្តពោធិ៍សាត់ កាលពីថ្ងៃទី០៧ ខែមេសា ឆ្នាំ២០២៣ មានភោជនីយដ្ឋាន និងអាហារដ្ឋានចំនួន៩កន្លែងបានប្រកាសប្ដេជ្ញា មិនលក់មុខម្ហូបធ្វើពីសាច់សត្វព្រៃឡើយ។ គិតមកទល់ពេលនេះ មានភោជនីយដ្ឋាន និងអាហារដ្ឋានសរុបប្រមាណជាង៦០កន្លែងហើយ ក្នុងខេត្តចំនួន៧ ដែលជាខេត្តអនុវត្តយុទ្ធនាការអន្ទាក់សូន្យ បានប្រកាសប្ដេជ្ញាមិនលក់ម្ហូបដែលធ្វើពីសាច់សត្វព្រៃ ដោយរាប់ទាំងខេត្តពោធិ៍សាត់ផងដែរ។
គួរឱ្យដឹងថា ក្រសួងបរិស្ថាន រួមជាមួយអង្គការដៃគូ ព្រមទាំងរដ្ឋបាលខេត្តពាក់ព័ន្ធនឹងបន្តដឹកនាំធ្វើយុទ្ធនាការអន្ទាក់សូន្យដំណាក់កាលទី២ ដែលរួមមានយុទ្ធនាការតាមខេត្តទៅកាន់ខេត្តពោធិ៍សាត់ កំពង់ស្ពឺ កោះកុង សៀមរាម បាត់ដំបង និងខេត្តប៉ៃលិន។ យុទ្ធនាការនេះធ្វើឡើងក្នុងគោលបំណងសំខាន់ ដើម្បីកាត់បន្ថយ និងទប់ស្កាត់ចំនួនអន្ទាក់នៅក្នុងតំបន់ការពារធម្មជាតិក្នុងខេត្តពោធិ៍សាត់ ក៏ដូចជានៅក្នុងតំបន់ការពារធម្មជាតិនានានៅក្នុងប្រទេសកម្ពុជា និងបណ្តុះស្មារតីស្រឡាញ់សត្វព្រៃកាន់តែខ្លាំងឡើងក្នុងចំណោមសាធារណជន៕
