សម្ដេច ទៀ បាញ់ ៖ កីឡាករ-កីឡាការិនីយើងកុំប្រហែស ប្រយ័ត្នបាត់មេដាយនៅទឹកដីខ្លួនឯង
សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្រ្តីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣ បានផ្ដាំផ្ញើដល់កីឡាករ-កីឡាការិនីដែលបានឈ្នះមេដាយពីព្រឹត្តិការណ៍កីឡាស៊ីហ្គេមលើកទី៣១ នៅប្រទេសវៀតណាម កាលពីឆ្នាំ២០២២ គឺមិនត្រូវភ្លេចខ្លួនឡើយ បើទោះបីជាខ្លួនមានសមត្ថភាពហើយក៏ដោយ។
សម្ដេចពិជ័យសេនាមានប្រសាសន៍យ៉ាងដូច្នេះថា ៖«កីឡាករ-កីឡាការិនីដែលជោគជ័យប្រជែងបានមេដាយកាលស៊ីហ្គេមនៅវៀតណាម សូមកុំភ្លេចខ្លួន បន្តប្រឹងប្រែងបន្ថែមទៀត បើទោះយើងជោគជ័យហើយក៏ដោយ។ យើងត្រូវដឹងថា គេមកប្រកួតនៅលើទឹកដីយើងគេនឹងយកអ្នកខ្លាំងមកប្រកួតជាមួយយើង។ ដូច្នេះយើងត្រូវតែបង្កើនសមត្ថភាពឲ្យបានខ្លាំងជាងមុន ព្រោះថាយើងជោគជ័យហើយ យើងប្រឹងប្រែងហ្វឹកហាត់ គេក៏បង្កើនការហ្វឹកហាត់ដូចគ្នា។ អីចឹងបើយើងហ៊ានតែធ្វេសប្រហែសនឹងអាចបាត់បង់គ្រប់មេដាយគ្រប់ពេលវេលា»។
សារផ្ដាំផ្ញើរបស់សម្ដេចពិជ័យសេនា ទៀ បាញ់ គឺបានធ្វើឡើងក្នុងពិធីប្រគល់ប្រាក់រង្វាន់លើកទឹកចិត្តរបស់សម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាជូនគ្រូបង្វឹក គ្រូជំនួយ កីឡាករ-កីឡាការិនីដែលឈ្នះមេដាយមាស ប្រាក់ និងសំរឹទ្ធពីការប្រកួតកីឡាស៊ីហ្គេម លើកទី៣១ ដែលសម្ដេចពិជ័យសេនាបានតំណាងដ៏ខ្ពស់ខ្ពស់សម្ដេចតេជោ ហ៊ុន សែន ប្រគល់ជយ័លាភីដោយផ្ទាល់នូវថវិកាសរុបចំនួន ៤១១,២០០ ដុល្លារ នៅព្រឹកថ្ងៃទី០១ ខែមេសា ឆ្នាំ២០២៣ នៅទីស្តីការក្រសួងការពារជាតិ៕
