រដ្ឋាភិបាលកំពុងជំរុញឱ្យក្រសួង២ពន្លឿនការសិក្សាលើគម្រោងស្ថាបនាផ្លូវរថដែកល្បឿនលឿន
សម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្នុងកិច្ចប្រជុំគណៈរដ្ឋមន្រ្តី នាថ្ងៃទី១៣ ខែមករា ឆ្នាំ២០២៣ បានថ្លែងជំរុញឱ្យក្រសួងសំខាន់ៗពីរគឺ ក្រសួងសេដ្ឋកិច្ចនិងហិរញ្ញវត្ថុ និងក្រសួងសាធារណការនិងដឹកជញ្ជូនឱ្យពន្លឿនការសិក្សាគម្រោងសាងសង់ផ្លូវរថភ្លើងពីរាជធានីភ្នំពេញទៅខេត្តព្រះសីហនុ និងពីរាជធានីភ្នំពេញទៅក្រុងប៉ោយប៉ែត ខេត្តបន្ទាយមានជ័យ ដោយអភិវឌ្ឍលើផ្លូវរថភ្លើងចាស់ដែលមានស្រាប់។
គម្រោងស្ថាបនាផ្លូវរថភ្លើងល្បឿនលឿនរបស់រាជរដ្ឋាភិបាលនេះ ក្នុងគោលបំណងធំសម្រាប់បម្រើឱ្យវិស័យដឹកជញ្ជូនឱ្យកាន់តែសម្បូរបែប និងដើម្បីជំរុញកំណើនសេដ្ឋកិច្ច-សង្គមកម្ពុជាឱ្យកាន់តែរីកចម្រើន ក៏ដូចជាបង្កើនប្រាក់ចំណូល និងលើកកម្ពស់ជីវភាពប្រជាជន។
បច្ចុប្បន្នកម្ពុជាមានផ្លូវដែកសំខាន់ៗចំនួន២ខ្សែ រួមមាន៖ ទី១.ផ្លូវដែកពីរាជធានីភ្នំពេញភ្នំពេញទៅខេត្តព្រះសីហនុ និងទី២.ផ្លូវដែកពីរាជធានីភ្នំពេញទៅកាន់ខេត្តបន្ទាយមានជ័យ៕
