មេតុងទីនអនឡាញអ្នកនាងម៉ូលីកា ត្រូវនាំខ្លួនទៅតុលាការហើយ!
(រាជធានីភ្នំពេញ)៖ កម្លាំងកងរាជអាវុធហត្ថរាជធានីភ្នំពេញ នៅរសៀលថ្ងៃទី១៦ ខែធ្នូ ឆ្នាំ២០២២ បានបញ្ជូនខ្លួនមេតុងទីនអនឡាញ និងជាអ្នកលក់អនឡាញល្បីឈ្មោះ អ្នកនាងអឿន ម៉ូលីកា ទៅកាន់សាលាដំបូងរាជធានីភ្នំពេញហើយ ដើម្បីបើកការស៊ើបសួរតាមនីតិវិធីច្បាប់។
គួររម្លឹកថា អ្នកនាងអឿន ម៉ូលីកា ត្រូវបានកម្លាំងកងរាជអាវុធហត្ថរាជធានីភ្នំពេញ ចុះឃាត់ខ្លួននៅវេលាម៉ោង ១៥៖២៥នាទី ថ្ងៃទី១៤ ខែធ្នូ ឆ្នាំ២០២២នេះ។ ការឃាត់ខ្លួនអតីតតារាចម្រៀង និងជាមេតុងទីនអនឡាញរូបនេះ ធ្វើឡើងតាមដីកាបញ្ជាឱ្យចូលខ្លួន របស់លោកច្រឹង ខ្មៅ ព្រះរាជអាជ្ញានៃអយ្យកាអមសាលាដំបូងរាជធានីភ្នំពេញ លេខ ៥៦៣ អ.យ.ក ចុះថ្ងៃទី១២ ខែធ្នូ ឆ្នាំ២០២២ ពាក់ព័ន្ធករណីមិនបំពេញកាតព្វកិច្ចចំពោះឧបករណ៍ដែលអាចជួញដូរបាន៕
