ចាប់ខ្លួនជនសង្ស័យ៥នាក់ពាក់ព័ន្ធករណីដាក់បង្កៃគ្រាប់បែកខាងមុខកាស៊ីណូណាហ្គាវើលដ៍
(រាជធានីភ្នំពេញ)៖ សមត្ថកិច្ចបានឃាត់ខ្លួនជនសង្ស័យជាជនជាតិចិនចំនួន៥នាក់ ពាក់ព័ន្ធនឹងករណីដាក់បង្កៃគ្រាប់បែកមួយគ្រាប់នៅខាងមុខក្រុមហ៊ុនកាស៊ីណូណាហ្គាវើលដ៍ ស្ថិតនៅក្នុងសង្កាត់ទន្លេបសាក់ ខណ្ឌចំការមន រាជធានីភ្នំពេញ កាលពីព្រឹក ថ្ងៃទី១៥ ខែធ្នូ ឆ្នាំ២០២២។ នេះបើតាមការបញ្ជាក់របស់លោកឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ ថ្លែងប្រាប់សារព័ត៌មានហ្វ្រេសញូវ។
អ្នកនាំពាក្យដដែលឱ្យដឹងថា ជនសង្ស័យទាំង៥នាក់នេះ ត្រូវបានឃាត់ខ្លួន នៅម៉ោង៧៖៣០នាទី ថ្ងៃទី១៥ ខែធ្នូ ឆ្នាំ២០២២ម្សិលមិញ ដោយកម្លាំងអធិការដ្ឋាននគរបាលខណ្ឌចំការមន សហការជាមួយកម្លាំងនាយកដ្ឋាននគរបាលព្រហ្មទណ្ឌក្រសួងមហាផ្ទៃ នៅចំណុចផ្ទះលេខ១៩ បូរីប៉េងហួត បឹងស្នោរ ផ្លូវM-០២ សង្កាត់និរោធ ខណ្ឌច្បារអំពៅ រាជធានីភ្នំពេញ។
ជនសង្ស័យជាជនជាតិចិនទាំង៥នាក់នេះ រួមមានឈ្មោះ៖ ទី១.ឈ្មោះYANG JIAKANG ភេទប្រុស អាយុ២៦ឆ្នាំ ជនជាតិចិន។ ទី២.ឈ្មោះTU LINAN ភេទស្រី អាយុ២៣ឆ្នាំ ជនជាតិចិន។ ទី៣.ឈ្មោះYANG YUDONG ភេទប្រុស អាយុ២៥ឆ្នាំ ជនជាតិចិន។ ទី៤.ឈ្មោះCHEN DI ភេទប្រុស អាយុ២៩ឆ្នាំ ជនជាតិចិន និងទី៥.ឈ្មោះសួង ស្រីអូន ភេទស្រី អាយុ៣៦ឆ្នាំ ជនជាតិខ្មែរ ។
ដោយឡែក ចំពោះវត្ថុតាងដែលសមត្ថកិច្ចឃាត់បាន ជារថយន្តម៉ាកLANG ROVER DEFENDER ពណ៌ស្លែមួយគ្រឿង សេរ៊ី២០២១ ពាក់ស្លាកលេខ កម្ពុជា-LC.9888។
បច្ចុប្បន្នជនសង្ស័យរួមទាំងវត្ថុ ត្រូវបានបញ្ជូនទៅកាន់ នាយកដ្ឋាននគរបាលព្រហ្មទណ្ឌក្រសួងមហាផ្ទៃចាត់ការបន្ត។
គួរឱ្យដឹងថា គ្រាប់បែកបង្កៃនេះ ត្រូវបានបុគ្គលិកក្រុមហ៊ុនស៊ិនទ្រី ប្រទះឃើញនៅក្នុងថង់ពណ៌សមួយ នៅខាងមុខក្រុមហ៊ុនណាហ្គាវើលដ៍ កាលពីព្រឹកថ្ងៃទី១៥ ខែធ្នូ ឆ្នាំ២០២២ ហើយបានរាយការណ៍ជូនសន្តិសុខក្រុមហ៊ុននេះ និងប្តឹងបន្តទៅសមត្ថកិច្ច។ ក្រោយពីប្រទះឃើញគ្រាប់បែកដូចការរាយការណ៍ កម្លាំងសមត្ថកិច្ចជំនាញបានរៀបចំបំផ្ទុះគ្រាប់បែកនេះចោលតែម្តង៕
