លោកខាត់ ចំរើន ប្អូនប្រុសបង្កើតអ្នកនាងខាត់ សុឃីម ទទួលមរណភាពដោយសារគាំងបេះដូង!

តារាកំប្លែងនិងចម្រៀង លោកខាត់ ចំរើន ជាប្អូនប្រុសបង្កើតអ្នកនាងខាត់ សុឃីម បានទទួលមរណភាពនៅវេលាម៉ោង៥ព្រឹក ថ្ងៃទី២០ ខែវិច្ឆិកា ឆ្នាំ២០២២នេះ។ ទាក់ទងនឹងមូលហេតុនៃការស្លាប់ បើតាមអ្នកនាងខាត់ សុឃីម ផ្ដល់បទសម្ភាសដល់សារព័ត៌មានFresh Newsថា ប្អូនប្រុសរបស់អ្នកនាងបានសន្លប់បាត់ស្មារតីអស់មួយថ្ងៃ ហើយត្រូវបានបញ្ជូនទៅកាន់មន្ទីរពេទ្យកាល់ម៉ែត្រ ប៉ុន្ដែក្រុមគ្រូពេទ្យមិនអាចជួយសង្គ្រោះបាននោះទេ ទើបទទួលមរណភាពតែម្ដងដោយសារគាំងបេះដូង។

គួរជម្រាបថា លោកខាត់ ចំរើន កើតនៅឆ្នាំ១៩៨២ គឺជាអ្នកសិល្បៈពហុជំនាញមួយរូប ដោយលោកអាចលេងកំប្លែង ច្រៀងចម្រៀងបុរាណ សម័យ រួមនឹងទេពកោសល្យជាច្រើនផ្សេងទៀត។ មរណភាពរបស់លោកគឺជាការបាត់បង់អ្នកសិល្បៈដ៏ប៉ិនប្រសព្វមួយរូប។

ចំពោះពិធីបុណ្យសពលោកខាត់ ចំរើន ប្រារព្ធឡើងនៅគេហដ្ឋាននៃសព ក្នុងបុរីពន្លឺថ្មី ភូមិ ត្រពាំងព្រាយ សង្កាត់ពញ្ញាពន់ ខណ្ឌព្រែកព្នៅ ជិតភ្នំបាសិទ្ធ។ សូមចូលរួមរំលែងទុក្ខដ៏ក្រៀមក្រំជាមួយក្រុមគ្រួសារសព និងសូមឱ្យវិញ្ញាណក្ខន្ធលោកខាត់ ចំរើនបានទៅកាន់សុគតិភព៕