គ្រោះថ្នាក់ណាស់! ជ្រុះដែកសរសៃជង់ជាប់ម៉ូតូ បណ្តាលឱ្យម្ចាស់ម៉ូតូរងរបួសស្រាល

ភ្នំពេញ៖ រថយន្តធុនធំមួយគ្រឿង ដឹកដែកសំពីងសំពោងខ្វះការប្រុងប្រយ័ត្ន ធ្លាក់ដែកសរសៃមួយដើមជង់ជាប់ម៉ូតូមួយគ្រឿង បណ្ដាលឲ្យបុរសអ្នកបើកបរដួល និងរងរបួសស្រាល។ ករណីនេះបានកើតឡើងនៅតាមបណ្តោយផ្លូវលេខ៣៧១ ក្បែរស្ថានីយបូមទឹកបឹងទំពុន ក្នុងសង្កាត់បឹងទំពុន ខណ្ឌមានជ័យ រាជធានីភ្នំពេញ នៅវេលាម៉ោង ១:២០នាទីរសៀល ថ្ងៃទី២៣ ខែឧសភា ឆ្នាំ២០២២។

យោងតាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ បុរសម្នាក់បានបើកម៉ូតូមួយគ្រឿងម៉ាកស្កូបពី ពណ៍ស ធ្វើដំណើរតាមបណ្ដោយផ្លូវលេខ៣៧១ ក្នុងទិសដៅបញ្ចាស់ទិសគ្នា ពីត្បូងទៅជើង និងរថយន្តធ្វើដំណើរពីជើងទៅត្បូង ខណៈបើកដល់ចំណុចកើតហេតុ រថយន្តធុនធំមួយគ្រឿង ពាក់ស្លាកលេខ ភ្នំពេញ 3C-2293 ដែលដឹកដែកសំពីងសំពោង ស្រាប់តែដែកសរសៃមួយដើមបានធ្លាក់ចេញពីរថយន្តធុនធំនោះ ជង់ជាប់ម៉ូតូរបស់ខ្លួនដួលភ្លាមៗនៅនឹងកន្លែងកើតហេតុ បណ្តាលឱ្យម្ចាស់ម៉ូតូរងរបួសស្រាលត្រង់ជើង។ កណីនេះបង្កឲ្យមានការភ្ញាក់ផ្អើល និងកកស្ទះយ៉ាងខ្លាំងនៅទីតាំងកើតហេតុ។ ភ្លាមៗនោះសមត្ថកិច្ចក៏បានចុះមកអន្តរាគមន៍ និងសម្រួលចរាចរណ៍។

ក្រោយពេលកើតហេតុ ម្ចាស់រថយន្តបានឈប់ធ្វើការដោះស្រាយជាមួយនឹងភាគីខាងម៉ូតូ ដោយភាគីខាងម៉ូតូទាមទារសំណង ២០០ដុល្លារ ដើម្បីយកទៅជួសជុលម៉ូតូ និងព្យាបាលរបួស តែម្ចាស់រថយន្តមានសមត្ថភាពត្រឹម ១០០ដុល្លារ ក៏ភាគីខាងម៉ូតូក៏យល់ព្រមយកបញ្ចប់រឿង។ ទន្ទឹមនឹងនេះ សមត្ថកិច្ចក៏បានធ្វើការអប់រំណែនាំឱ្យម្ចាស់រថយន្តដឹកដែកសំពីងសំពោងនោះ មានការប្រុងប្រយ័ត្នខ្ពស់ ជៀសវៀងបង្កគ្រោះថ្នាក់ដល់អាយុជីវិតអ្នកធ្វើដំណើរនៅលើដងផ្លូវ៕

អត្ថបទ៖ ឌីយ៉ាម៉ង់