បានត្រឹមស្មើ Huddersfield! ស្វាគមន៍ក្រុម Manchester United មកកាន់ Europa League រដូវកាលក្រោយ!

អង់គ្លេស៖ ក្រោយបានត្រឹមស្មើជាមួយក្រុម Huddersfield Town យប់មិញនេះ បិសាចក្រហម Manchester United ត្រូវបានធ្លាក់ទៅបង្ហាញខ្លួននៅពាន Europa League ជាផ្លូវការនារដូវកាលក្រោយ។ ក្រុម Huddersfield ដែលកំពុងមានទម្រង់លេងដុនដាបខ្លាំង ពោលគឺរកបានតែ ៣ពិន្ទុប៉ុណ្ណោះ ក្នុងចំណោម ២២ប្រកួតចុងក្រោយ និងត្រូវបានកាត់ចេញពី Premier League រួចរាល់ បែរជាអាចទប់បានស្មើជាមួយ ១ទល់នឹង១ ជាមួយ Man UTD និងបញ្ចប់ក្តីសង្ឃឹម Top4 របស់ក្លិបនេះជាផ្លូវការ។

លទ្ធផលកាលពីយប់មិញនេះមានន័យថា Manchester United មិនស្គាល់ពាក្យថាឈ្នះម្តងណាឡើយក្នុងចំណោម ៥ប្រកួតចុងក្រោយនេះ ដែលជាកំណត់ត្រាអាក្រក់បំផុតរបស់ក្លិប រាប់ចាប់តាំងពីការដឹកនាំរបស់លោក Van Gaal កាលពីឆ្នាំ ២០១៥ ដែលកាលណោះក្លិបមិនស្គាល់ពាក្យថាឈ្នះ ៨ប្រកួតជាប់គ្នា។

យ៉ាងណាមិញ លទ្ធផលនេះបានបង្ហាញថា Manchester United នឹងត្រូវធ្លាក់ទៅចូលរួមនៅក្របខណ្ឌ Europa League នារដូវកាលក្រោយ សាជាថ្មីម្តងទៀត ក្រោយធ្លាក់ទៅចូលរួមក្របខណ្ឌ Europa League និងឈ្នះពាននេះថ្មីៗ កាលពីរដូវកាល ២០១៦-១៧។ ដោយឡែក នៅក្របខណ្ឌ Premier League វិញ Manchester United និងអាចបានត្រឹមចំណាត់ថ្នាក់លេខ ៥ប៉ុណ្ណោះនារដូវកាលនេះ ប្រសិនបើអាចយកឈ្នះប្រកួតក្រោយ ហើយ Arsenal បានត្រឹមស្មើ ឬចាញ់៕