Zuckerberg ធ្លាប់តែជាសេដ្ឋីពាន់លានវ័យក្មេងបំផុតក្នុងលោក ឥឡូវមានអ្នកប្រជែងហើយ
យោងតាម Forbes បានចុះផ្សាយកាលពីថ្ងៃអង្គារថា Kylie Jenner បានឡើងមកឈរចំណាត់ថ្នាក់កំពូល នាមជាសេដ្ឋីប្រាក់ពាន់លានវ័យក្មេងជាងគេបង្អស់ក្នុងបញ្ជីឈ្មោះមហាសេដ្ឋីលំដាប់កំពូលក្នុងពិភពលោក។
ស្ត្រីវ័យ ២១ ឆ្នាំរូបនេះកំពុងក្ដោបក្ដាប់ទ្រព្យសម្បត្តិប្រមាណ ១ ពាន់លានដុល្លារ ផ្តួលកំណត់ត្រាចាស់របស់ស្ថាបនិក Facebook លោក Mark Zuckerberg ដែលត្រូវចំណាយពេលដល់វ័យ ២៣ ឆ្នាំទើបឈានមកដល់ចំណុចប៉ុណ្ណេះបាន។
ចំណូលពាន់លានរបស់ស្រីស្អាតសញ្ជាតិអាមេរិករូបនេះ កើតចេញពីក្រុមហ៊ុនគ្រឿងសំអាង Kylie Cosmetics របស់នាងដែលទើបតែចុះហត្ថលេខាលើកិច្ចព្រមព្រៀងផ្តាច់មុខជាមួយ Ultra Beauty ។ តាមការប៉ាន់ប្រមាណពី Forbes ក្រុមហ៊ុនរបស់នាងបច្ចុប្បន្នមានតម្លៃប្រមាណ ៩០០ លានដុល្លារ ហើយក្នុងនោះ Jenner កាន់កាប់ភាគហ៊ុនម្នាក់ឯងទាំង ១០០ ភាគរយ។
រំឭកថាស្ថាបនិកក្រុមហ៊ុនបច្ចេកវិទ្យាពីររូបផ្សេងទៀតក៏ទើបលេចឈ្មោះក្នុងបញ្ជី Forbes ដោយរួមមានស្ថាបនិក Spotify លោក Daniel Ek មានទ្រព្យសម្បត្តិ ២,៣ ពាន់លានដុល្លារ និង Martin Lorentzon មានទ្រព្យសម្បត្តិ ៣,១ ពាន់លានដុល្លារ ស្របពេល Evan Spiegel វ័យ ២៨ ឆ្នាំមេធំ Snapchat ក៏ឈរក្នុងចំណាត់ថ្នាក់ Top Eight ជាបុគ្គលមានវ័យក្រោម ៣០ ឆ្នាំមានទ្រព្យច្រើនជាង ២ ពាន់លានដុល្លារ។
ប្រភព៖ Cnet ប្រែសម្រួល៖ កែវ ចន្ទ័សុផាវរុណ
