ផ្អើលទៀតហើយ! ម្តាយ Tangmo គំរាមលោតពីលើកាំជណ្តើរ ព្រោះស្ដ្រេសនឹងអ្នកកាសែតចោមរោមសួរច្រើនពេក
អស់រយៈពេលជិត ២ សប្តាហ៍ទៅហើយ ដែលរឿងរ៉ាវការស្លាប់របស់តារាសម្តែងស្រី Tangmo នៅមិនអាចរក សខ្មៅឃើញនៅឡើយ ហើយមួយរយៈក្រោយនេះ សំណុំរឿងក្ដីនេះ គឺហាក់រឹតតែស្មុគស្មាញទៅទៀត ដោយសារតែម្តាយនាងបានចេញមុខមកប្រតិកម្ម និង បដិសេធលើបញ្ហាមួយចំនួន ធ្វើឱ្យមហាជនវិលក្បុងតាម មិនតិចនោះទេ។
យ៉ាងណាមិញ នៅថ្ងៃទី ៩ ខែមីនា ឆ្នាំ ២០២២ នេះ ខាងប៉ូលិសក៏បានកោះហៅសួរនាំអ្នកម្តាយរូបនេះ ដើម្បីសាកសួរបន្ថែមទាំងទងនឹងរឿងក្តីរបស់កូនស្រី។ ប៉ុន្តែអ្វីដែលធ្វើឱ្យមហាជនហួសចិត្តនោះ គឺពេលដែលលោកស្រីបានដើរកាត់ហ្វូងពួកអ្នកកាសែត ក្នុងសភាពអារម្មណ៍តានតឹង ហើយខណៈដែលកំពុងឡើងទៅប៉ុស្តិ៍ អ្នកកាសែតក៏បានតាមសួរទាក់ទងនឹងរឿងក្តី និងរឿងដែលលោកស្រី ហៅមេធាវីមកជួយនោះ ស្រាប់តែ
លោកស្រីក៏បានហាមមិនឱ្យពួកអ្នកកាសែត ចូលមកជិតឡើយ និង ព្រមទាំងគំរាមគេថា បើមិនស្តាប់ទេ លោកស្រីនឹងលោតចុះពីលើកាំជណ្តើរដែលកំពុងឡើងនេះមិនខាន។ ក្រោយឮបែបនេះ អ្នកកាសែតទាំងនោះភ្ញាក់ផ្អើលជាខ្លាំង ម្នាក់ៗក៏នាំគ្នាថយចេញ ហើយក៏បានប្រាប់ឱ្យលោកស្រីធ្វើចិត្តឱ្យត្រជាក់ទៀតផង។
យ៉ាងណាមិញ បន្ទាប់ពីត្រូវបានប៉ូលិសសាកសួររួចហើយ លោកស្រីក៏បានឡើងឡានត្រឡប់ទៅវិញ ប៉ុន្តែក៏នៅតែមានអ្នកកាសែតតាមចោមរោមច្រើនដដែល៕
