ពលរដ្ឋប្រកបរបរការដឹកជញ្ជូនត្អូញត្អែរ ពីតម្លៃប្រេងឡើងថ្លៃ
ភ្នំពេញ៖ គិតរហូតដល់ដំណាច់ខែកុម្ភៈ តម្លៃប្រេងលក់នៅលើទីផ្សារកម្ពុជាកើនឡើងរហូតដល់ ៤ ៧០០ រៀលក្នុង ១ លីត្រ ធ្វើអោយប្រជាពលរដ្ឋប្រកបរបរក្នុងកិច្ចការដឹកជញ្ជូនបានត្អូញត្អែរ ដោយសារការចំណាយលើមធ្យោបាយដឹកជញ្ជូនកាន់តែខ្ពស់។
អ្នករត់ម៉ូតូឌុបនៅក្បែរផ្សារគីឡូម៉ែត្រលេខ៦ សុំមិនបញ្ចេញឈ្មោះបានអោយដឹងថា ចាប់តាំងពីតម្លៃប្រេងសាំងឡើងលើស ៤ ០០០ រៀលមក ការចំណាយលោកបានកើនឡើង ខណៈដែលចំណូលវិញនៅដដែល និងថ្ងៃខ្លះថយចុះថែមទៀត។
លោកបានរៀបរាប់ថា កាលពីមុន តម្លៃប្រេងសាំងមិនទាន់ឡើងខ្លាំង លោកអាចរកចំណូលបានចន្លោះពី ៤ ទៅ ៥ ម៉ឺនរៀល ក្រោយទូទាត់ចំណាយថ្លៃសាំងរួច ប៉ុន្តែប៉ុន្មានខែចុងក្រោយនេះ សាំងឡើងថ្លៃឥតឈប់ ស្របពេលមិនសូវមានអ្នកដំណើរជិះនោះទេ ដោយសារជំងឺកូវីដ-១៩ ចាប់ផ្តើមរាតត្បាតឡើងវិញទៀតដែលបានធ្វើគ្រួសាររបស់លោកកាត់បន្ថយការចំណាយ។
លោកថា៖ «ខ្ញុំមិនដឹងថាហេតុអ្វីបានជាសាំងឡើងថ្លៃរហូតបែបនេះ បើនៅបន្តឡើងទៀត ខ្ញុំប្រហែលជារកការងារសំណង់ធ្វើវិញហើយ ព្រោះសព្វថ្ងៃសាំងឡើងថ្លៃខ្លាំង តែតម្លៃដឹកនៅដដែល ហើយក៏មិនសូវមានអ្នកជិះដែរ គេខ្លាចកូវីដ។ ខ្ញុំត្រូវចិញ្ចឹមប្រពន្ធ និងកូន ៣ នាក់ សុទ្ធតែនៅរៀនដោយត្រូវចំណាយលើថ្លៃម្ហូប ថ្លៃផ្ទះជួល ថ្លៃទឹកភ្លើង បើរកបានមួយថ្ងៃ ២-៣ ម៉ឺន តើខ្ញុំសង្ឃឹមអី!»។
លោកនិយាយថា៖ «ថ្វីដ្បិតតែប្រេងឥន្ធនៈឡើងថ្លៃ ប៉ុន្តែតម្លៃនៃការដឹកជញ្ជូនពីខាងសមាគមមិនមានការឡើងថ្លៃឡើយ ពោលគឺនៅតម្លៃដដែល ដែលបានធ្វើឱ្យចំណូលធ្លាក់ចុះ ដោយសារការចំណាយទៅលើឥន្ធនៈច្រើនជាងមុន»។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានអោយដឹងថា កន្លងទៅសម្តេចតេជោ បានអនុញ្ញាតផ្តល់ការឧបត្ថម្ភធន ៤ សេនដុល្លារក្នុង ១ លីត្រ ក្រសួងបានអនុវត្តជាហូរហែមក ក្រៅពីនេះ ក្រសួងពាណិជ្ជកម្មនឹងបន្តប្រឹងប្រែងពិនិត្យ និងតាមដាន បើសភាពនៅតែមិនល្អ ដោយតម្លៃនៅតែឡើងក្រសួងនឹងបើកកិច្ចប្រជុំជាមួយវិស័យឯកជន។
លោកបញ្ជាក់ថា៖ «វិធានការតទៅមុខទៀត គឺយើងមិនមែនព្រងើយកន្តើយចំពោះបញ្ហានេះឡើយ កាលណាតម្លៃប្រេងឡើងខ្ពស់ដល់ដំណាក់កាលដែលយើងត្រូវជជែកជាមួយវិស័យឯកជន យើងនឹងរៀបចំ ដើម្បីស្វះស្វែងរកវិធីសាស្ត្រធ្វើយ៉ាងណាដើម្បីសម្រួលថា ខាងភាគីឯកជនអាចទទួលយកបានហើយពលរដ្ឋអាចមានប្រេងប្រើប្រាស់បាន»៕
