សម្តេចតេជោ ៖ ថ្ងៃនេះរកឃើញអ្នកឆ្លងកូវីដថ្មីចំនួន ១០៨នាក់ ជាប្រភេទអូមីក្រុងទាំងអស់

ភ្នំពេញ ៖​ ក្នុងឱកាសអញ្ជើញសម្ពោធ ដាក់ឱ្យប្រើប្រាស់កំណាត់ផ្លូវជាតិលេខ៧ ក្នុងខេត្តក្រចេះនៅព្រឹកថ្ងៃចន្ទទី៧ ខែកុម្ភៈ ឆ្នាំ២០២២នេះ សម្តេចតេជោ ​ហ៊ុន សែន ​បានលើកឡើងថា ថ្ងៃនេះរកឃើញអ្នកឆ្លងកូវីដថ្មីចំនួន ១០៨នាក់ ជាប្រភេទអូមីក្រុង ក្នុងនោះមិនមានអ្នកស្លាប់ដោយសារជំងឺកូវីដ១៩ នោះទេ ។

សម្តេចតេជោ ហ៊ុន សែន បានថ្លែងបន្តថា តាមការប្រកាសរបស់ក្រសួងសុខាភិបាល បានប្រកាសជារៀងរាល់ថ្ងៃពីអត្រាឆ្លងជំងឺកូវីដ-១៩ ដែលការប្រកាសថ្មីៗ ឃើញមានមេរោគអូមីក្រុង ដែលជាករណីឆ្លងចូលមានចំនួនតិច ហើយឆ្លងក្នុងសហគមន៍ច្រើន រីឯមេរោគដែលតា និងអាល់ហ្វា បានបាត់អស់រលីងហើយ នៅតែមេរោគអូមេក្រុងតែប៉ុណ្ណោះ ដូច្នេះសូមអំពាវនាវដល់ប្រជាពលរដ្ឋទាំងអស់គោរពអោយបាននូវវិធានការការពារសុខភាព ៣កុំ និង៣ការពារ ឱ្យបានម៉ឹងម៉ាត់បំផុត។

រយៈពេល៣៤ថ្ងៃជាប់គ្នាហើយ ចាប់ពីតាំងពីថ្ងៃទី៥ ខែមករាមក កម្ពុជាមិនមានអ្នកស្លាប់ដោយជំងឺកូវីដ១៩ ខណៈថ្ងៃនេះរកឃើញអ្នកឆ្លងកូវីដថ្មី ប្រភេទអូមីក្រុងចំនួន ១០៨នាក់។

សូមជម្រាបថា គិតត្រឹមការប្រកាសរបស់ក្រសួងសុខាភិបាលថ្ងៃទី៦ ខែកុម្ភៈ ឆ្នាំ២០២២ កម្ពុជារកឃើញអ្នកឆ្លងជំងឺកូវីដ១៩៖ សរុបចំនួន១២១,៧៧៣នាក់, អ្នកជាសះស្បើយសរុបចំនួន១១៨,១២២នាក់, ស្លាប់សរុបចំនួន៣,០១៥នាក់៕